OpenAI kompaniyasi oʻzining ilk sunʼiy intellektga asoslangan smartfonini ishlab chiqish jarayonini tezlashtirmoqda. Taniqli tahlilchi Ming-Chi Kuo maʼlumotlariga koʻra, qurilmaning apparat taʼminoti uchun MediaTek Dimensity 9600 chipsetining maxsuslashtirilgan versiyasi tanlab olindi. Bu haqda Ixbt.com xabar beradi.
Yangi smartfon anʼanaviy ilovalardan foydalanish oʻrniga, mahalliy va bulutli modellarni birlashtiruvchi aqlli agent vazifasini bajaradi. Qurilma foydalanuvchining real vaqtdagi holatini tahlil qilib, oddiy vazifalarni qurilmaning oʻzida, murakkablarini esa bulutli serverlarda qayta ishlaydi.
Texnik jihatdan smartfon ilgʻor ISP tizimi, ikkita NPU bloki hamda LPDDR6 va UFS 5.0 xotira standartlari bilan jihozlanishi kutilmoqda. Chipset TSMC N2P texnologik jarayoni asosida ishlab chiqariladi.
OpenAI ushbu loyihani kompaniyaning IPO jarayoniga tayyorgarlik koʻrishdagi asosiy mahsulotlardan biri sifatida koʻrmoqda. Taxminlarga koʻra, smartfon 2027-yilda ommaviy ishlab chiqarishga chiqariladi va ikki yil ichida 30 million donagacha sotilishi mumkin.
“Zamin”ni Telegramʻda oʻqing!
