Xitoyning sunʼiy intellekt sohasidagi yetakchi laboratoriyalaridan biri boʻlgan DeepSeek oʻzining ilk venchur investitsiya bosqichini oʻtkazish boʻyicha muzokaralar olib bormoqda. Financial Times va Bloomberg xabarlariga koʻra, kompaniyaning bozor qiymati bir necha hafta ichida 20 milliard dollardan 45 milliard dollargacha koʻtarilgan. Bu haqda Techcrunch.com xabar beradi.
DeepSeek 2025-yil boshida AQShning OpenAI va Anthropic kabi gigantlari bilan solishtirganda ancha kam resurs va mablagʻ evaziga oʻqitilgan yirik til modelini taqdim etib, katta shuhrat qozondi. Kompaniya oʻz modellarini Hugging Face platformasi orqali ochiq kodli shaklda taqdim etib, mantiqiy fikrlash va dasturlash sohalarida dunyodagi eng ilgʻor texnologiyalar bilan raqobatlashmoqda.
Kompaniya asoschisi, milliarder Liang Wenfeng ilgari tashqi investitsiyalarni jalb etmagan. Biroq, raqobatchilar tomonidan xodimlarni jalb qilish holatlari koʻpaygani sababli, u xodimlarga aksiyalar ulushini berish maqsadida mablagʻ yigʻishga qaror qildi. Ushbu investitsiya bosqichiga Xitoyning davlat investitsiya jamgʻarmasi yetakchilik qilishi kutilmoqda.
Xitoy AQSh texnologiyalari, xususan, chiplar taqchilligini yengib oʻtish uchun mahalliy sunʼiy intellekt yechimlarini qoʻllab-quvvatlamoqda. DeepSeek modellari Huawei kompaniyasining chiplarida ishlash uchun optimallashtirilgan boʻlib, bu tandem Xitoyning texnologik mustaqilligini taʼminlashda muhim ahamiyat kasb etadi. Shuningdek, Tencent va Alibaba kompaniyalari ham ushbu investitsiya jarayonida ishtirok etishi mumkinligi aytilmoqda.
“Zamin”ni Telegramʻda oʻqing!
