Toronto politsiyasi shaharning markaziy qismida SMS-blaster qurilmasidan foydalanib, minglab odamlarga zararli xabarlar yuborgan uch nafar shaxsni hibsga oldi. 2025-yilning noyabr oyidan buyon faoliyat yuritib kelgan ushbu guruhga nisbatan 44 ta ayblov ilgari surildi. Rasmiy maʼlumotlarga koʻra, bu Kanadada qayd etilgan ilk shunday holatdir. Bu haqda Techcrunch.com xabar beradi.
SMS-blasterlar mobil aloqa minoralarini soxtalashtirish va kuchliroq signal tarqatish orqali yaqin-atrofdagi smartfon hamda planshetlarni oʻziga ulashga majbur qiladi. Qurilma 2G tarmoqlaridagi xavfsizlik boʻshliqlaridan foydalanib, foydalanuvchilarga fishing havolalari boʻlgan xabarlarni yuboradi. Ushbu havolalar orqali jinoyatchilar bank hisoblari va shaxsiy maʼlumotlarni oʻgʻirlashni maqsad qilgan.
Politsiya vakillarining taʼkidlashicha, ushbu qurilmalar nafaqat firibgarlik uchun ishlatilgan, balki 911 favqulodda xizmatlariga ham xalaqit bergan. Maxsus jihozlangan avtomobil ichiga oʻrnatilgan qurilma shahar boʻylab harakatlanib, turli hududlarda xabarlar tarqatish imkonini bergan. Xuddi shunday holat 2024-yilda Bangkokda ham kuzatilgan edi.
Mutaxassislar foydalanuvchilarga telefon sozlamalaridan 2G aloqa tarmogʻini oʻchirib qoʻyishni tavsiya qilmoqda. Xususan, Apple qurilmalari egalari Lockdown Mode funksiyasini yoqish orqali ushbu turdagi xavflardan himoyalanishlari mumkin.
“Zamin”ni Telegramʻda oʻqing!
