Xitoylik tadqiqotchilar eski mobil telefon akkumulyatorlari va yogʻoch sanoati chiqindilarini natriy-ionli energiya toʻplagichlari uchun komponentlarga aylantirishning yangi usulini ishlab chiqishdi. Xenan pedagogika universiteti va Tsilun texnologiya universiteti olimlari tomonidan yaratilgan anod materiali metallar va lignindan olingan uglerod aralashmasidan iborat. Bu haqda Ixbt.com xabar beradi.
Mutaxassislar ishlatilgan batareyalardan metall birikmalarini ajratib olib, ularni tozalangan lignin bilan aralashtirishdi. Kimyoviy ishlov berish va azot muhitida karbonizatsiya jarayonidan soʻng, material asalari uyasini eslatuvchi oʻziga xos gʻovakli tuzilishga ega boʻldi. Bunday arxitektura elektrolitning material ichiga oson kirib borishini taʼminlaydi va natriy ionlarining harakatini tezlashtiradi.
Tadqiqot mualliflarining taʼkidlashicha, lignin shunchaki uglerod qoʻshimchasi vazifasini bajarmaydi. U qayta ishlash jarayonida Co9S8 sulfid fazasini shakllantirishga yordam beradi, bu esa anod ichida samarali ikki fazali tuzilmani hosil qiladi. Bu oʻz navbatida elektr oʻtkazuvchanlikni oshiradi va koʻp marta quvvatlash hamda zaryadsizlanish davrlarida barqarorlikni taʼminlaydi.
Sinovlar davomida material har bir gramm uchun 1060 mA·soatdan ortiq boshlangʻich sigʻimni namoyish etdi. 300 ta sikldan soʻng ham material oʻz samaradorligini saqlab qoldi. Ushbu texnologiya kelajakda elektromobillar, energiya saqlash tizimlari va portativ elektronika uchun arzon hamda ekologik toza akkumulyatorlar ishlab chiqarishda muhim qadam boʻlishi kutilmoqda.
“Zamin”ni Telegramʻda oʻqing!
