Xelsinki, Tbilisi va Moskva fiziklari guruhi koinotimiz nima uchun yoʻq boʻlib ketmay, moddadan tashkil topganini tushuntiruvchi yangi matematik modelni taqdim etdi. Tadqiqotga koʻra, Katta portlash shunchaki kengayish emas, balki fazo-vaqtning ikkiga ajralish jarayoni boʻlgan. Natijada bizning koinotimiz va vaqt teskari oqadigan, zarrachalari qarama-qarshi xususiyatga ega boʻlgan oyna koinot vujudga kelgan. Bu haqda Ixbt.com xabar beradi.
CPT-simmetriya qonuniga koʻra, tabiat qonunlari zaryad, fazo va vaqt oʻzgarganda ham oʻzgarmas qolishi kerak. Biroq kuzatiladigan olamda materiya koʻp, antimateriya esa deyarli yoʻq. Professor Masud Chaichian, Merab Gogberashvili va Margarita Mnatsakanova koinotni yagona tizim emas, balki simmetrik juftlikning bir qismi sifatida koʻrib, bu muvozanatni matematik jihatdan isbotladilar.
Olimlarning fikricha, Katta portlashning ilk lahzalarida inflyaton zarrachalari oʻzining antipodlariga nisbatan biroz ogʻirroq boʻlgan. Bu kichik massa farqi materiyaning antimateriyadan koʻproq hosil boʻlishiga olib keldi. Aynan shu ortiqcha modda bugungi kunda biz koʻrib turgan galaktikalar, yulduzlar va atomlarning asosini tashkil etadi.
Ushbu nazariya Yevropa kosmik agentligining Planck sunʼiy yoʻldoshi maʼlumotlari bilan toʻliq mos keladi. Bundan tashqari, model qorongʻu materiyaning tabiatini ham tushuntirib beradi: u aynan oyna koinotdagi zarrachalardan iborat boʻlishi mumkin. Koinotning tezlashib kengayishi esa ikki olam oʻrtasidagi kvant bogʻliqligi natijasi sifatida talqin qilinadi.
“Zamin”ni Telegramʻda oʻqing!
