Yevropa aerokosmik sanoatining yetakchilari — Fransiyaning Dassault Aviation va Germaniyaning OHB kompaniyalari Vortex-S nomli ko‘p maqsadli kosmik samolyotni yaratish uchun konsorsium tuzganliklarini e’lon qilishdi. Yevropa kosmik agentligiga (ESA) taqdim etilgan ushbu loyiha Yevropaning orbital tashuvlar sohasidagi texnologik mustaqilligini ta’minlashga qaratilgan. Bu haqda Ixbt.com xabar beradi.
Vortex-S kosmik stansiyalarga muntazam qatnovlarni amalga oshirish hamda avtonom ilmiy missiyalarni bajarish imkoniyatiga ega bo‘ladi. Hamkorlik doirasida Dassault Aviation kosmik kemaning bosh arxitektori va tizimli integratori vazifasini bajarsa, OHB servis modulini ishlab chiqish va integratsiya qilish uchun mas’ul bo‘ladi.
Dassault Aviation rahbari Eric Trappier ushbu ittifoq Yevropaning kosmosdagi suverenitetini mustahkamlash yo‘lidagi tabiiy qadam ekanligini ta’kidladi. OHB bosh direktori Marco Fuchs esa Dassault kompaniyasining Rafale qiruvchi samolyotlarini yaratishdagi tajribasi OHB’ning sun’iy yo‘ldosh texnologiyalari bo‘yicha ekspertizasi bilan mukammal uyg‘unlashishini qayd etdi.
Loyihaning poydevori Dassault Aviation’ning avvalgi Hermes dasturi va IXV (Intermediate eXperimental Vehicle) eksperimental loyihalaridagi gipertovushli texnologiyalar hamda boshqaruv tizimlariga asoslanadi. Vortex-S ochiq tashabbus bo‘lib, kelgusida boshqa yirik Yevropa kompaniyalarining ham qo‘shilishi kutilmoqda.
Agar ESA loyihani ma’qullasa, Vortex-S kelgusi o‘n yillikda Yevropaning asosiy transport tizimiga aylanadi. Bu esa agentlikning xorijiy xizmatlarga bo‘lgan qaramligini kamaytirib, past Yer orbitasida biologik va fizik tajribalar o‘tkazish imkoniyatlarini sezilarli darajada kengaytiradi.
“Zamin”ni Telegramʻda oʻqing!
