The Wall Street Journal nashrining xabar berishiga koʻra, Google va SpaceX kompaniyalari kosmosda orbital maʼlumotlar markazlarini joylashtirish imkoniyatlarini muhokama qilmoqda. Ushbu loyiha SpaceX kompaniyasining sunʼiy intellekt hisoblash quvvatlarini Yer orbitasiga koʻchirish orqali xarajatlarni kamaytirish strategiyasining bir qismi sifatida koʻrilmoqda. Bu haqda Techcrunch.com xabar beradi.
Elon Musk orbital maʼlumotlar markazlarini boshqarish yer ustidagi markazlarga qaraganda arzonroq boʻlishini taʼkidlab keladi. Shuningdek, bunday yechimlar yerda qurilish ishlariga qarshi chiqayotgan mahalliy aholi va ekologik tashkilotlarning eʼtirozlaridan xoli boʻlishi mumkinligi aytilmoqda.
Biroq, mutaxassislar sunʼiy yoʻldoshlarni qurish va ularni orbitaga chiqarish xarajatlarini hisobga olganda, hozirgi yer usti maʼlumotlar markazlari ancha tejamkor ekanligini taʼkidlashadi. Shunga qaramay, Google oʻzining Project Suncatcher tashabbusi doirasida 2027-yilga qadar prototip sunʼiy yoʻldoshlarni uchirishni rejalashtirmoqda.
Maʼlumot uchun, Google 2015-yilda SpaceX kompaniyasiga 900 million dollar sarmoya kiritgan edi. Hozirgi kunda Google boshqa raketa ishlab chiqaruvchi kompaniyalar bilan ham hamkorlik qilish imkoniyatlarini koʻrib chiqmoqda.
“Zamin”ni Telegramʻda oʻqing!
