Google kompaniyasi Android operatsion tizimida xavfsizlik tadqiqotchilariga josuslik dasturlari hujumlarini o‘rganishga yordam beradigan yangi funksiyani taqdim etdi. "Intrusion Logging" deb nomlangan ushbu imkoniyat Android’ning "Advanced Protection Mode" tizimi tarkibiga kiradi va foydalanuvchilarga o‘z ixtiyori bilan faollashtirish imkonini beradi. Bu haqda Techcrunch.com xabar beradi.
Ushbu funksiya davlat darajasidagi josuslik dasturlari va huquqni muhofaza qiluvchi organlar tomonidan ma’lumotlarni o‘g‘irlash uchun ishlatiladigan forensik vositalarga qarshi kurashishga mo‘ljallangan. Amnesty International tashkiloti bilan hamkorlikda ishlab chiqilgan mazkur tizim Android qurilmalarida forensik ma’lumotlar sifatini tubdan yaxshilaydi.
Ilgari tizim jurnallari (logs) xavfsizlik buzilishlarini aniqlash uchun mo‘ljallanmagan edi va ular tez-tez o‘chirib yuborilardi. Endilikda "Intrusion Logging" xavfsizlik bilan bog‘liq hodisalarni qayd etib, ularni shifrlangan holda foydalanuvchining Google bulutli xotirasiga yuklaydi, bu esa hujumchilarning izlarni yo‘q qilishiga yo‘l qo‘ymaydi.
Google ma’lumotlariga ko‘ra, yangi funksiya Android 16 dekabr yangilanishi va undan keyingi versiyalarda ishlaydigan barcha qurilmalarga bosqichma-bosqich joriy etilmoqda. Shifrlangan ma’lumotlarga faqat foydalanuvchining o‘zi kirish huquqiga ega bo‘lib, Google kompaniyasining o‘zi ham ularni ko‘ra olmaydi.
“Zamin”ni Telegramʻda oʻqing!
