Machdyne kompaniyasi F-RAM (ferroelektrik xotira) texnologiyasiga asoslangan yangi FERRIT USB-nushasini taqdim etdi. Ushbu qurilma anʼanaviy NAND-flesh xotiralardan farqli oʻlaroq, ekstremal sharoitlarda ishlashga va maʼlumotlarni 200 yilgacha saqlashga moʻljallangan. Bu haqda Ixbt.com xabar beradi.
FERRIT xotirasining asosiy afzalligi shundaki, u radiatsiyaga yuqori darajada chidamli va qayta yozish resursi deyarli cheksizdir. Shu sababli, qurilma kosmik sanoat, harbiy tizimlar va muhim texnik hujjatlarni uzoq muddatli arxivlash uchun ideal yechim hisoblanadi.
Qurilma modulli tizimda ishlab chiqilgan boʻlib, Raspberry Pi RP2040 mikrokontrolleri va FERRIT-CY kontrolleri bilan jihozlangan. USB-C porti orqali ulanadigan ushbu xotira hech qanday qoʻshimcha drayverlarsiz oddiy tashqi disk sifatida ishlaydi. Maksimal konfiguratsiyada uning hajmi 256 MB gacha yetishi mumkin.
Loyihaning ochiq kodli ekanligi ham eʼtiborga loyiq: barcha sxemalar, proshivka va hujjatlar GitHub platformasida eʼlon qilingan. Biroq, texnologiyaning murakkabligi sababli qurilma arzon boʻlmaydi — 256 MB hajmli toʻliq komplekt taxminan 6400 dollarga baholanmoqda.
“Zamin”ni Telegramʻda oʻqing!
