Elon Musk asos solgan SpaceX kompaniyasi o‘zining eng yirik Starship V3 raketasi haqida yangi ma’lumotlarni oshkor qildi. Yangi avlod raketasi parvoz va sinov jarayonlarini har tomonlama nazorat qilish imkonini beruvchi 50 ta kamera bilan jihozlangan. Taqqoslash uchun, Starship V2 modellarida odatda 20 tadan 30 tagacha kamera o‘rnatilgan bo‘lib, yangi ko‘rsatkich diagnostika imkoniyatlarini sezilarli darajada oshiradi. Bu haqda Ixbt.com xabar beradi.
Kameralar sonining ko‘payishi SpaceX muhandislariga raketa konstruksiyasi, dvigatellar va issiqlikdan himoyalovchi qoplamalarning real vaqt rejimida qanday ishlashini aniqroq kuzatish imkonini beradi. Bu ma’lumotlar kelgusidagi parvozlarni yanada xavfsizroq va samaraliroq qilish uchun muhim ahamiyatga ega.
Shuningdek, tizimga Starlink sun’iy yo‘ldosh aloqasi integratsiya qilingan bo‘lib, u 480 Mbit/s gacha bo‘lgan tezlikda ma’lumot uzatishni ta’minlaydi. Yuqori tezlikdagi ushbu kanal katta hajmdagi vizual va texnik ma’lumotlarni Yerga kechikishlarsiz yuborish imkonini beradi.
Elon Muskning so‘zlariga ko‘ra, Starship raketasining navbatdagi versiyasi hozirgisidan ham balandroq bo‘lib, uning balandligi 150 metrga yetishi mumkin. Mazkur yangilanishlar shunchaki kichik o‘zgarishlar emas, balki butun tizimni tubdan qayta ishlash jarayonidir. Raketaning navbatdagi sinov parvozi 20-may sanasiga rejalashtirilgan.
“Zamin”ni Telegramʻda oʻqing!
