Dreame kompaniyasi Xitoy bozorida yangi Y-Wind31 konditsionerlar turkumini namoyish qildi. Ushbu qurilmalarning asosiy afzalligi shovqin darajasining juda pastligi bo‘lib, u atigi 18 dB(A)ni tashkil etadi. Bu xususiyat konditsionerni yotoqxona va tinchlik talab etiladigan boshqa xonalar uchun ideal tanlovga aylantiradi. Bu haqda Ixbt.com xabar beradi.
Yangi modellar havo oqimini 7,2 metrgacha masofaga yetkazib bera oladi. Dreame havo sifatiga alohida e’tibor qaratgan: qurilmalar chang, gulchang va uy hayvonlari junini tutib qoluvchi HEPA-filtr bilan jihozlangan. Shuningdek, o‘rnatilgan tizim xonadagi CO2 konsentratsiyasini kamaytirishga yordam beradi.
Qurilma soatiga 1,5 litrgacha namlikni yutish qobiliyatiga ega bo‘lgan quritish rejimiga ega. Qo‘shimcha funksiyalar qatoriga 57 °C haroratda o‘zini tozalash, -35 dan +65 °C gacha bo‘lgan ekstremal haroratlarda ishlash hamda tungi vaqtda displey yorug‘ligini avtomatik o‘chiradigan yorug‘lik datchigi kiradi.
Konditsionerlarni Dreame mobil ilovasi orqali masofadan turib boshqarish mumkin. Hozirgi vaqtda Y-Wind31 seriyasi faqat Xitoyda sotuvga chiqarilgan. Kompaniya mahsulotning xalqaro bozorga, jumladan Yevropaga qachon chiqishi haqida hozircha ma’lumot bermadi.
“Zamin”ni Telegramʻda oʻqing!
