AQSh prezidenti Donald Trump Pekinga rasmiy tashrif bilan yetib keldi. Bu so‘nggi o‘n yillikda amaldagi Amerika prezidentining Xitoyga amalga oshirgan ilk yirik tashrifi bo‘ldi. Tashrif doirasida Donald Trump Xitoy rahbari Si Tszinpin bilan muzokaralar o‘tkazishi va davlat darajasidagi qabul marosimlarida ishtirok etishi rejalashtirilgan. Bu haqda Ixbt.com xabar beradi.
Ushbu safar nafaqat siyosiy, balki iqtisodiy jihatdan ham katta ahamiyatga ega. AQSh delegatsiyasi tarkibidan dunyoning yetakchi texnologiya kompaniyalari rahbarlari o‘rin olgan. Xususan, Tesla asoschisi Elon Musk, NVIDIA bosh direktori Jensen Huang va Apple rahbari Tim Cook kabi nufuzli shaxslar Pekin muzokaralarida ishtirok etmoqda.
Muzokaralarning asosiy kun tartibidan savdo tariflari, nodir metallar ta’minoti, sun’iy intellekt rivoji hamda Eron va Tayvan bilan bog‘liq geosiyosiy masalalar o‘rin olgan. Tomonlar, shuningdek, Amerika samolyotlari va qishloq xo‘jaligi mahsulotlarini Xitoyga yetkazib berish bo‘yicha yirik bitimlarni muhokama qilishi kutilmoqda.
Delegatsiya tarkibiga Boeing rahbari Kelly Ortberg va GE Aerospace bosh direktori Larry Culp kabi sanoat gigantlari vakillari ham kiritilgan. Ushbu tashrif ikki davlat o‘rtasidagi iqtisodiy aloqalarni qayta tiklash va texnologik hamkorlikni yangi bosqichga olib chiqish uchun muhim qadam sifatida baholanmoqda.
“Zamin”ni Telegramʻda oʻqing!
