Moskva aviatsiya instituti mutaxassislari kichik laboratoriyalar, talabalar loyihalari va startaplar uchun mo‘ljallangan byudjetli bosma platalar ishlab chiqarish qurilmasini taqdim etdi. Ushbu loyiha sanoat darajasidagi qimmatbaho uskunalarni sotib olish iqtisodiy jihatdan samarasiz bo‘lgan holatlar uchun maxsus ishlab chiqilgan. Bu haqda Ixbt.com xabar beradi.
An’anaviy fotolitografiya jarayoni qimmat fotoshablonlarni talab qiladi va dizaynga tezkor o‘zgartirish kiritish imkonini bermaydi. Yangi qurilma esa suyuq kristalli matritsa va raqamli korreksiya tizimidan foydalanadi. Dasturiy ta’minot real vaqt rejimida materialdagi mikro-deformatsiyalarni kompensatsiya qilib, ekspozitsiya aniqligini sezilarli darajada oshiradi.
Qurilmaning asosiy afzalligi — mahalliy va hamkor davlatlardan olingan arzon butlovchi qismlardan foydalanishdir. Bu yondashuv uskuna tannarxini sanoat analoglariga nisbatan 20–30 barobar arzonlashtirishga imkon berdi. Yakuniy foydalanuvchi uchun qurilmaning narxi 300 mingdan 500 ming rublgacha baholanmoqda.
Hozirgi kunda loyihaning ishchi prototipi tayyor bo‘lib, u bir qavatli va ikki qavatli platalarni ekspozitsiyalash bo‘yicha barcha sinovlardan muvaffaqiyatli o‘tdi. Mutaxassislarning fikricha, ushbu qurilma ko‘plab muhandislik va tadqiqot vazifalarini bajarish uchun yetarli darajada samarali hisoblanadi.
“Zamin”ni Telegramʻda oʻqing!
