Rossiya bozoridagi yirik osiyolik nashriyotchilarning ma’lumotlariga ko‘ra, mamlakatdagi mobil o‘yinlar o‘rnatilishining 50 foizigacha bo‘lgan qismi RuStore platformasi hissasiga to‘g‘ri kelmoqda. Bu haqda ilovalar do‘koni matbuot xizmati rasman ma’lum qildi. Bu haqda Ixbt.com xabar beradi.
RuStore foydalanuvchilari yuqori faollik ko‘rsatmoqda: rossiyalik o‘yinchilarning 45 foizi o‘yin ichidagi xaridlarni amalga oshiradi, to‘lov qiluvchi har uchinchi foydalanuvchi esa aynan ushbu platforma orqali keladi. Shuningdek, platformada foydalanuvchilarning ikki oy ichida qaytish ko‘rsatkichi xorijiy muqobillarga qaraganda ikki baravar yuqori ekanligi qayd etilgan.
Xitoyning Bronze Games kompaniyasi Rossiyadagi o‘zining ilk loyihasi bo‘lgan «Legendy Pomestya» o‘yinini aynan RuStore orqali ishga tushirdi. Bir necha oy ichida o‘yin 100 mingga yaqin yuklab olish va 3,5 milliondan ortiq tranzaksiyani amalga oshirishga muvaffaq bo‘ldi. Legends Reborn va Doomsday kabi loyihalarga ega xitoylik studiyalar ham RuStore orqali o‘rnatishlar ulushi yuqori ekanligini ta’kidlashmoqda.
RuStore rahbari Dmitriy Pankrushev Xitoyda bo‘lib o‘tgan RuStore GameDev Connect tadbirida Rossiyada osiyolik raqamli kontentga bo‘lgan qiziqish barqaror o‘sib borayotganini ta’kidladi. Faqatgina oxirgi oyning o‘zida bunday xizmatlar va o‘yinlarning o‘rnatilish soni qariyb uchdan bir qismga oshgan.
“Zamin”ni Telegramʻda oʻqing!
