Rossiyaning yirik marketpleyslari aprel oyida foydalanuvchilar faolligining pasayishiga duch keldi. Bunga mamlakat hududida VPN-trafikni cheklash bo‘yicha joriy etilgan yangi choralar sabab bo‘ldi. Digital Budget ma’lumotlariga ko‘ra, eng katta pasayish Wildberries platformasida kuzatilgan: mobil veb-trafik 10 foizga, kompyuterlardagi trafik esa 6 foizga qisqargan. Bu haqda Ixbt.com xabar beradi.
Boshqa yirik platformalar ham salbiy dinamikani qayd etdi. Xususan, Ozon va Yandex Market mobil trafigi 3 foizga, Avito esa 1,5 foizga kamaydi. Mutaxassislarning fikricha, VPN taqiqlari birinchi navbatda mobil foydalanuvchilarga ta’sir ko‘rsatmoqda. Ko‘plab foydalanuvchilar boshqa xizmatlarga kirish uchun VPN’ni doimiy yoqib qo‘yishadi, bu esa marketpleys ilovalarining sekin ishlashiga yoki uzilishlarga olib kelmoqda.
Strategy Partners baholashicha, ilovalar trafigining pasayishi 2 foizdan 10 foizgacha yetgan, savdo hajmi esa 4 foizgacha qisqargan. Sotuvchilarning ta’kidlashicha, aprel oyida daromadlar mart oyiga nisbatan 3 foizdan 30 foizgacha kamaygan. Bu holat elektron tijorat bozorining umumiy aylanmasiga ham ta’sir o‘tkazib, taxminan 7 milliard rubl miqdorida zarar keltirgan.
Ushbu vaziyatda o‘z ekotizimiga va ichki trafik kanallariga ega platformalar yutuqda qolmoqda. Xususan, Yandex Market o‘zining qidiruv tizimi, brauzeri va reklama xizmatlari orqali yo‘qotishlarning bir qismini qoplash imkoniga ega. Ijtimoiy tarmoqlar va messenjerlardan keladigan tashqi trafikka bog‘liq bo‘lgan maydonchalar esa eng zaif bo‘lib qolmoqda.
“Zamin”ni Telegramʻda oʻqing!
