Google kompaniyasi Android operatsion tizimi uchun taqdim etilgan Gemini Intelligence funksiyasi boʻyicha apparat taʼminotiga qoʻyiladigan talablarni oshirdi. Endilikda ushbu sunʼiy intellekt imkoniyatlaridan foydalanish uchun smartfon kamida 12 GB tezkor xotira (RAM), yuqori unumdorlikka ega flagman protsessor va AICore tizim platformasini qoʻllab-quvvatlashi shart. Bu haqda Ixbt.com xabar beradi.
Ushbu yangi standart bozordagi oʻrta va quyi segmentdagi koʻplab Android qurilmalarni ushbu texnologiyadan chetda qoldiradi. Shu sababli, yaqin kelajakda Gemini Intelligence funksiyasi faqat eng ilgʻor va qimmatbaho smartfon modellarida mavjud boʻladi.
Dastlabki maʼlumotlarga koʻra, mazkur funksiyani qoʻllab-quvvatlaydigan ilk qurilmalar qatoriga Samsung Galaxy Z Fold8 va Galaxy Z Flip8 buklanuvchi smartfonlari kiradi. Shuningdek, Google Pixel 10 va Samsung Galaxy S26 modellari yoz faslida tizim yangilanishi orqali ushbu imkoniyatga ega boʻlishi kutilmoqda.
Gemini Intelligence — bu smartfonni haqiqiy aqlli yordamchiga aylantiruvchi sunʼiy intellekt vositalari toʻplamidir. U nafaqat savollarga javob beradi, balki ilovalar ichida avtomatlashtirilgan amallarni bajarishga qodir. Masalan, foydalanuvchi buyurtma berish, xizmatlarga yozilish yoki skrinshot asosida xaridlar savatini shakllantirish kabi vazifalarni sunʼiy intellektga topshirishi mumkin.
“Zamin”ni Telegramʻda oʻqing!
