Rostelekom kompaniyasi prezidenti Mixail Oseyevskiyning maʼlum qilishicha, tashkilot ichki jarayonlarni optimallashtirishga moʻljallangan Neyroshlyuz nomli yangi sunʼiy intellekt mahsulotini ishlab chiqdi. Ushbu yechim turli xil til modellarini oʻz ichiga olgan boʻlib, u amaliy vazifalarni samaraliroq bajarish imkonini beradi. Bu haqda Ixbt.com xabar beradi.
Oseyevskiyning soʻzlariga koʻra, mazkur loyiha allaqachon tijoriy maqomga ega boʻlib, bir qator davlat organlari bilan uni qoʻllash boʻyicha shartnomalar imzolangan. Kompaniya sunʼiy intellekt texnologiyalarini robotlashtirish sohasida faol joriy etmoqda va bu borada xitoylik hamkorlar bilan yaqindan ishlamoqda.
Hozirgi vaqtda yangi texnologiyalar kompaniyaning turli korxonalarida sinovdan oʻtkazilmoqda. Xususan, ayrim ishlab chiqarish obyektlarida robot-payvandchilar allaqachon oʻz ishini boshlab yuborgan.
Rostelekom rahbariyati kelgusida tayyor mahsulotni sotishdan koʻra, servis modeliga oʻtishni rejalashtirmoqda. Bu jarayon mavjud texnologik tizimlarga tayyor yechimlarni integratsiya qilish va xizmat koʻrsatishni oʻz ichiga oladi.
“Zamin”ni Telegramʻda oʻqing!
