Tom’s Hardware nashri mutaxassislari Microsoft kompaniyasining Advanced Shader Delivery (ASD) texnologiyasini sinovdan oʻtkazishdi. Ushbu yangilik sheyderlarni oldindan kompilyatsiya qilish orqali oʻyinlarning yuklanish vaqtini sezilarli darajada qisqartirishga xizmat qiladi. Dastlabki natijalar shuni koʻrsatdiki, ASD yordamida oʻyinlar bir necha baravar, ayrim hollarda esa 10-20 baravargacha tezroq ishga tushishi mumkin. Bu haqda Ixbt.com xabar beradi.
Hozircha ushbu texnologiya test rejimida ishlamoqda va faqat RDNA 3 arxitekturasidan eski boʻlmagan AMD Radeon videokartalarini qoʻllab-quvvatlaydi. Shuningdek, u faqat Xbox doʻkonidan yuklab olingan cheklangan miqdordagi oʻyinlar bilan ishlaydi. Sinovlar Radeon RX 9070 XT videokartasi oʻrnatilgan tizimda oltita oʻyin misolida oʻtkazildi.
Tekshirilgan oʻyinlarning ikkitasida sheyderlar kompilyatsiyasi kuzatilmadi va yuklanish vaqti oʻzgarmadi. Biroq qolgan toʻrtta oʻyinda yuklanish vaqti 56 foizdan 96 foizgacha qisqardi. Masalan, Forza Horizon 6 oʻyini avvalgi 48 soniya oʻrniga atigi 2 soniyada yuklandi, bu esa 24 baravar tezroq deganidir.
ASD texnologiyasi nafaqat yuklanish tezligiga, balki oʻyin jarayonining barqarorligiga ham ijobiy taʼsir koʻrsatadi. Oʻrtacha unumdorlik biroz oshgan boʻlsa-da, 1% Low koʻrsatkichi sezilarli darajada yaxshilandi. Xususan, Forza Horizon 6 da bu koʻrsatkich 54 FPS dan 72 FPS gacha koʻtarildi. Bu esa oʻyin davomidagi kutilmagan qotishlarning kamayishini anglatadi.
Xulosa oʻrnida aytish mumkinki, Microsoft ASD texnologiyasi geymerlar vaqtini tejashda juda samarali ekanini isbotladi. Endilikda ushbu funksiyaning keng ommaga taqdim etilishi kutilmoqda. Taʼkidlash joizki, Intel kompaniyasi ham oʻzining Graphics Shader Distribution Service kabi shunga oʻxshash yechimlarini ishlab chiqmoqda.
“Zamin”ni Telegramʻda oʻqing!
