Baseus kompaniyasi 20 000 mA·soat sigʻimga va 30 W quvvatga ega yangi tashqi akkumulyatorini taqdim etdi. Qurilmaning asosiy oʻziga xosligi — uning korpusiga oʻrnatilgan kabellar boʻlib, bu foydalanuvchini oʻzi bilan qoʻshimcha simlar olib yurish tashvishidan xalos etadi. Bu haqda Ixbt.com xabar beradi.
Akkumulyator 2C+1A+Lightning konfiguratsiyasiga ega: korpus ichiga USB-C va Lightning kabellari joylangan. USB-C kabeli 30 W gacha ikki tomonlama quvvatlashni, Lightning esa 20 W gacha quvvatni qoʻllab-quvvatlaydi. Bu esa qurilmani ham Android, ham Apple foydalanuvchilari uchun birdek qulay qiladi.
Bundan tashqari, qurilmada qoʻshimcha ikkita port — USB-C (30 W) va USB-A (22,5 W) mavjud boʻlib, ular yordamida bir vaqtning oʻzida toʻrttagacha gadjetni quvvatlash mumkin. Umumiy quvvat ulangan qurilmalar oʻrtasida taqsimlanadi.
Ichki akkumulyator 74 W·soat energiya sigʻimiga ega, bu esa aviatsiya tashuvlari meʼyorlariga toʻliq javob beradi. Ishlab chiqaruvchining taʼkidlashicha, bu sigʻim iPhone 17 smartfonini taxminan 3,8 marta yoki boshqa brendlarning zamonaviy flagmanlarini 2–2,5 marta quvvatlashga yetadi.
Qurilma korpusi quvvat foizini koʻrsatuvchi LED-displey bilan jihozlangan. Shuningdek, gadjet PD 3.0, PPS va QC 3.0 kabi tezkor quvvatlash standartlarini qoʻllab-quvvatlaydi.
“Zamin”ni Telegramʻda oʻqing!
