Rossiyada Telegram uchun moʻljallangan MTProto-proksi xizmatlari ishlamayotgani haqida shikoyatlar keskin koʻpaydi. Mamlakatning turli hududlaridagi foydalanuvchilar va turli aloqa operatorlari mijozlari ushbu muammoga duch kelishmoqda. Koʻplab proksi-serverlar yo uzilishlar bilan ishlamoqda, yoki butunlay ulanishni toʻxtatgan. Bu haqda Ixbt.com xabar beradi.
Parallel ravishda foydalanuvchilar VPN-servislar faoliyatidagi nosozliklar boʻyicha ham ommaviy murojaat qilishni boshladilar. Soha mutaxassislarining taxminiga koʻra, regulyatorlar Telegram cheklovlarni aylanib oʻtish va trafikni niqoblash uchun foydalanadigan MTProto-proksi protokollarini bloklashning yangi usulini topgan boʻlishi mumkin.
VPN-servislar uchun ham qoʻshimcha qiyinchiliklar yuzaga keldi. Xosting-provayderlar ayrim tarmoq mexanizmlari, jumladan, Chrome brauzeri fingerpintlari va TCP-RAW protokolining ayrim variantlari bloklanayotgani haqida xabar bermoqda. Ushbu texnologiyalar koʻplab VPN-yechimlar tomonidan trafik filtratsiyasini chetlab oʻtish uchun qoʻllaniladi.
Shunga oʻxshash holat avvalroq ham kuzatilgan edi. Oʻshanda MTProto-proksi xizmatlari ommaviy ravishda ishdan chiqqan, biroq Telegram jamoasi chiqargan yangilanishdan soʻng muammolarning bir qismini bartaraf etishga muvaffaq boʻlingan edi. Hozircha rasmiy idoralar ushbu cheklovlar boʻyicha izoh bermadi.
“Zamin”ni Telegramʻda oʻqing!
