Bir necha yil davomida Nokia brendi ostida smartfonlar ishlab chiqargan HMD kompaniyasi endilikda oʻzining yangi hamyonbop modeli — HMD Grand qurilmasini taqdim etishga tayyorlanmoqda. Insayder smashx_60 maʼlumotlariga koʻra, yangi smartfon FHD+ aniqlikdagi va 90 Hz yangilanish chastotasiga ega ulkan 6,9 dyuymli IPS-ekran bilan jihozlanadi. Bu haqda Ixbt.com xabar beradi.
Qurilmaning texnik asosi sifatida Snapdragon 6s 4G Gen 2 chipseti tanlangan. Ushbu protsessor aslida Snapdragon 685 modelining yangilangan versiyasi boʻlib, 5G tarmogʻini qoʻllab-quvvatlamaydi. Smartfon ikki xil rangda sotuvga chiqishi kutilmoqda va uning old kamerasi ekranning markaziy qismidagi maxsus tirqishga joylashtirilgan.
HMD Grand modelining asosiy oʻziga xosligi uning kameralarida: qurilma 50 megapikselli asosiy modul va 8 megapikselli oʻta keng burchakli datchikdan tashqari, 50 megapikselli frontal kameraga ham ega boʻladi. Budjet toifasidagi smartfon uchun bunday yuqori aniqlikdagi selfi-kamera kamdan-kam uchraydigan holatdir.
Yana bir muhim jihat — bu qurilmaning avtonom ish vaqti. Smartfonga 6000 mA·soat sigʻimli akkumulyator oʻrnatilgan boʻlib, u 33 W quvvatda tezkor zaryadlanishni qoʻllab-quvvatlaydi. Shuningdek, foydalanuvchilar stereodinamiklar, NFC, Bluetooth 5.1 va Wi-Fi 5 kabi funksiyalardan foydalanishlari mumkin boʻladi.
Xotira masalasida HMD Grand 8 GB tezkor va 256 GB doimiy xotiraga ega maksimal konfiguratsiyada taklif etiladi. Maʼlumot oʻrnida, ushbu insayder avvalroq HMD Icon Flip 1 va kompaniyaning boshqa yangi tugmachali telefonlari haqida aniq maʼlumotlarni taqdim etgan edi.
“Zamin”ni Telegramʻda oʻqing!
