Yevropa Ittifoqi (YeI) tomonidan 5G tarmoqlarida Xitoy texnologiyalarini taqiqlash rejalari fonida Germaniya va Ispaniya kabi davlatlar telekommunikatsiya yechimlarini ishlab chiqishda Huawei kompaniyasini qoʻllab-quvvatlamoqda. Ushbu mamlakatlarning rasmiy vakillari Huawei mahsulotlaridan foydalanishni cheklash YeI darajasida javob choralarini keltirib chiqarishi mumkinligidan xavotirda. Bu haqda Ixbt.com xabar beradi.
Shu bilan birga, mutaxassislar bunday taqiq sunʼiy intellekt infratuzilmasining qimmatlashishiga olib kelishini taʼkidlamoqda, chunki Xitoy texnologiyalari iqtisodiy jihatdan ancha arzon hisoblanadi. Agar taqiq kuchga kirsa, Germaniya va Ispaniya mobil aloqa operatorlariga Xitoy texnologiyalaridan voz kechish uchun uch yildan ortiq vaqt va 3,4 milliarddan 4,3 milliard yevrogacha mablagʻ talab etiladi.
Germaniya iqtisodiyot vaziri Katerina Rayxe Pekinga tashrifi chogʻida ushbu mavzuga toʻxtalib, YeI Xitoy bilan savdo aloqalarida koʻrilayotgan choralar blokning eksport salohiyatiga zarar yetkazmasligini taʼminlashi kerakligini bildirdi. Uning soʻzlariga koʻra, eksportchi davlat sifatida Germaniya adolatsiz raqobatga qarshi kurashish bilan birga, oʻz kompaniyalarining eksport imkoniyatlarini saqlab qolishdan manfaatdor.
Huawei kompaniyasi esa Xitoy tarmoq texnologiyalari yetkazib beruvchilarini infratuzilmadan bosqichma-bosqich chiqarib tashlash taklifi Yevropa Ittifoqining adolat va huquqiy tamoyillariga zid ekanini taʼkidlamoqda. Kompaniya vakillari bunday qarorlar bozor raqobatiga salbiy taʼsir koʻrsatishini maʼlum qilgan.
“Zamin”ni Telegramʻda oʻqing!
