Alphabet kompaniyasiga tegishli Waymo startapi Los-Anjeles, Feniks va San-Fransisko shaharlaridagi tanlangan foydalanuvchilar uchun oʻzining eng yangi robotaksilarini taqdim etdi. Xitoyning Zeekr brendi tomonidan ishlab chiqarilgan ushbu toʻliq elektr quvvatli minivenlar xarajatlarni kamaytirish va yuz minglab yoʻlovchilarga xizmat koʻrsatishga moslashtirilgan. Hozircha Ojai deb nomlanuvchi ushbu transport vositalarida yurish bepul boʻlib, kompaniya bu orqali mijozlar fikrini oʻrganishni maqsad qilgan. Bu haqda Techcrunch.com xabar beradi.
Ojai modeli yillar davomida olib borilgan sinovlar natijasi boʻlib, u qulaylik, oson texnik xizmat koʻrsatish va arzon operatsion xarajatlarni koʻzlaydi. Ushbu miniven Xitoyning Geely Holdings kompaniyasiga qarashli Zeekr brendi bilan hamkorlikda yaratilgan. Avtomobil Shvetsiyada loyihalashtirilgan boʻlib, u maxsus SEA-M arxitekturasiga asoslangan. Bu platforma kelajakdagi robotaksilar va logistika transportlari uchun maxsus ishlab chiqilgan.
Yangi robotaksi Waymo kompaniyasining oltinchi avlod haydovchisiz boshqaruv tizimi bilan jihozlangan. Tizim tarkibiga 13 ta kamera, 4 ta lidar, 6 ta radar va tashqi audio qabul qiluvchilar kiradi. Ushbu texnologiyaning asosiy ustunligi uning modulligidadir, yaʼni uni nafaqat Zeekr minivenlariga, balki Hyundai Ioniq 5 kabi boshqa turdagi avtomobillarga ham osonlik bilan oʻrnatish mumkin.
Hozirda Waymo parki asosan 3700 ta Jaguar I-Pace avtomobillaridan iborat boʻlib, kompaniya har haftada 500 mingdan ortiq pullik buyurtmalarni bajarmoqda. Yangi Ojai minivenlarining joriy etilishi kompaniya parkini kengaytirish va daromadlilikni oshirish yoʻlidagi muhim qadamdir. Garchi soʻnggi paytlarda kompaniya suv toshqinlari va yoʻl qurilish hududlaridagi texnik muammolar tufayli ayrim shaharlarda xizmatni vaqtincha toʻxtatgan boʻlsa-da, yangi model texnologik oʻsishni taʼminlashi kutilmoqda.
“Zamin”ni Telegramʻda oʻqing!
