Cognition startapi asoschisi va bosh direktori Scott Wu yaqinda oʻzining ikki yillik kompaniyasi 26 milliard dollar baho bilan 1 milliard dollar investitsiya jalb qilganidan soʻng yana diqqat markaziga tushdi. Cognition dunyodagi birinchi va eng muvaffaqiyatli AI-dasturchilardan biri boʻlgan Devin loyihasining muallifi hisoblanadi. Wuʻning soʻzlariga koʻra, Devin vazifalarni boshidan oxirigacha mustaqil bajara oladi, bu esa dasturiy taʼminot ishlab chiqishda yangi davrni boshlab beradi. Bu haqda Techcrunch.com xabar beradi.
Koʻpchilikni Devin oʻrta darajadagi (L4) dasturchilarning oʻrnini egallaydimi degan savol qiziqtirmoqda. Scott Wu TechCrunch nashriga bergan intervyusida bu savolga ham ijobiy, ham salbiy javob berdi. "Biz hech qachon insonlar oʻrnini bosish haqida oʻylamaganmiz. Garchi koʻpchilik shunday ssenariylarni taxmin qilayotgan boʻlsa-da, bizning qarashimiz butunlay boshqacha", — deya taʼkidladi u.
Texnologiya olamida sunʼiy intellekt sababli ish oʻrinlari qisqarayotgan bir paytda, Wu dasturchilar ishsiz qolishini istamasligini bildirdi. Uning oʻzi toʻqqiz yoshidan beri kod yozadi va bolaligida koʻplab matematika hamda dasturlash musobaqalarida gʻolib chiqqan. Wu hatto Scale AI asoschisi Alexandr Wang kabi boshqa mashhur wunderkindlar bilan bir davrada ulgʻaygan.
Wuʻning fikricha, Devin — bu dasturchining oʻrnini bosuvchi vosita emas, balki uning eng yaqin yordamchisidir. U oʻz ish stolida kompyuter ushlab turgan yumshoq oʻyinchoqni koʻrsatib, uni Devin ramzi deb atadi. "Bu sizga koʻproq narsalarni yaratishda yordam beradigan doʻstingizdir", — deydi u.
Yakunda Scott Wu sunʼiy intellekt dasturlash jarayonidagi zavqni tortib olmasligi kerakligini aytdi. Uning soʻzlariga koʻra, dasturchilar nimanidir noldan yaratishni va oʻz gʻoyalarini mahsulotga aylantirishni yaxshi koʻradilar. Devin kabi agentlar esa faqatgina murakkab texnik jarayonlarni osonlashtirib, inson va yakuniy mahsulot oʻrtasidagi navbatdagi qulay qatlam boʻlib xizmat qiladi.
“Zamin”ni Telegramʻda oʻqing!
