Reddit forumining Ok_Study_592 nikli foydalanuvchisi Google kompaniyasining rasmiy servis markazi bilan bogʻliq muammoli vaziyat haqida soʻzlab berdi. U oʻzining Pixel 9 Pro smartfonini ekrandagi vertikal yashil chiziqlar — maʼlum bir zavod nuqsoni sababli taʼmirlashga yuborgan edi. Bu haqda Ixbt.com xabar beradi.
Ushbu nuqson Google tomonidan rasman tan olingan va u kengaytirilgan kafolat dasturi (Extended Repair Program) doirasiga kiradi. Biroq, servis markazi kutilmaganda smartfonni bepul taʼmirlashdan bosh tortdi. Qurilma egasining taʼkidlashicha, telefonda hech qanday zarba, suv tushishi yoki boshqa tashqi shikastlanish alomatlari mavjud emas.
Diagnostika natijalariga koʻra, Google foydalanuvchiga 489 dollar miqdorida hisob-faktura yuborgan. Qizigʻi shundaki, tizim nosozlikni displey defekti sifatida emas, balki telefon qoʻngʻiroqlari bilan bogʻliq muammo deb notoʻgʻri tasniflagan. Foydalanuvchi qoʻllab-quvvatlash xizmatiga murojaat qilgan boʻlsa-da, hozircha qarorni qayta koʻrib chiqishga erisha olmadi.
Vaziyatni yanada murakkablashtirayotgan jihati shundaki, mijoz taʼmirlash pulini toʻlamaguncha yoki nizoni boshqa yoʻl bilan hal qilmaguncha, Google smartfonni egasiga qaytarib bermayapti. Foydalanuvchi ushbu holat yuzasidan AQSHning isteʼmolchilar huquqlarini himoya qilish tashkilotlariga murojaat qilishini maʼlum qildi.
Ushbu voqea Google servis xizmatining ishi boʻyicha navbatdagi shikoyatlarga sabab boʻldi. Koʻplab foydalanuvchilar hatto kafolat doirasidagi holatlarda ham servis markazlari bilan uzoq davom etadigan va asabiy jarayonlarga duch kelayotganliklarini bildirishmoqda.
“Zamin”ni Telegramʻda oʻqing!
