Xiaomi kompaniyasi oʻzining yangi Mijia Refrigerator Pro 620L muzlatgichini bozorga chiqardi. Side-by-side formatidagi ushbu model hozirda 370 dollar narxida sotuvga qoʻyilgan boʻlib, u oʻzining keng sigʻimi va zamonaviy funksiyalari bilan ajralib turadi. Bu haqda Ixbt.com xabar beradi.
Yangi qurilmaning umumiy ichki hajmi 620 litrni tashkil etadi: shundan 378 litri sovutish boʻlmasiga, 242 litri esa muzlatish kamerasiga tegishli. Ishlab chiqaruvchining taʼkidlashicha, bunday hajm butun bir oila uchun taxminan ikki haftalik oziq-ovqat zaxirasini saqlashga yetarli. Ichki qismda 18 ta saqlash zonasi va mustahkamlangan javonlar mavjud.
Texnik jihatdan model ikki konturli tizim bilan jihozlangan: sovutish va muzlatish kameralari oʻzining alohida bugʻlatgich va ventilyatorlariga ega boʻlib, havo oqimlari bir-biridan mustaqil ishlaydi. Bu esa hidlar aralashib ketmasligini taʼminlaydi. Shuningdek, 360 darajali havo sirkulyatsiyasi haroratning bir tekis taqsimlanishiga xizmat qiladi.
Xiaomi gigiyenaga ham alohida eʼtibor qaratgan. Muzlatgichga kumush ionli modullar oʻrnatilgan boʻlib, ular antibakterial ishlov berish va yoqimsiz hidlarni 99,99% gacha samaradorlik bilan yoʻqotish imkonini beradi. Eshiklar 90 darajaga ochilishi sababli uni tor joylarda ham qulay oʻrnatish mumkin.
Aqlli qurilma sifatida Mijia Refrigerator Pro 620L mobil ilova orqali boshqarish, masofadan turib haroratni sozlash va ovozli buyruqlar berish funksiyalarini qoʻllab-quvvatlaydi.
“Zamin”ni Telegramʻda oʻqing!
