Qozogʻiston kelajakda boshqariladigan kosmik missiyalarni amalga oshirish uchun yangi «Soyuz-5» raketa-tashuvchisidan foydalanish imkoniyatlarini koʻrib chiqmoqda. Bu haqda «Boyqoʻngʻir» maʼmuriyati rahbari Konstantin Busigin TASS agentligiga bergan intervyusida maʼlum qildi. Bu haqda Ixbt.com xabar beradi.
Uning soʻzlariga koʻra, Qozogʻiston tomoni «Soyuz-5» raketasini ekipajli parvozlar uchun moslashtirish tashabbusi bilan chiqqan. Biroq, hozircha bu masala faqat uzoq muddatli istiqbol sifatida koʻrilmoqda va loyihani amalga oshirish boʻyicha aniq muddatlar belgilanmagan.
Busigin «Bayterek» loyihasining amalga oshirilishi va yangi raketaning yaratilishi Rossiya hamda Qozogʻiston oʻrtasidagi hamkorlikni sezilarli darajada mustahkamlaganini taʼkidladi. Ushbu loyiha kosmik sohadagi sheriklik munosabatlarini rivojlantirishda muhim omilga aylandi.
«Soyuz-5» raketasining ilk sinov parvozi 30-aprel kuni «Boyqoʻngʻir» kosmodromidan amalga oshirilgan edi. Raketa parvoz dasturini muvaffaqiyatli bajargan boʻlib, uning yuk koʻtarish quvvati 17 tonnagacha yetadi.
Maʼlumot uchun, «Bayterek» loyihasi 2004-yildan buyon amalga oshirib kelinmoqda. U «Boyqoʻngʻir» kosmodromida yangi kosmik raketa majmuasini yaratishni koʻzda tutadi.
“Zamin”ni Telegramʻda oʻqing!
