Namanganlik muhandis universal mini-traktor ixtiro qildi

To‘raqo‘rg‘onlik gaz va elektr payvandchisi Hojinazar Xodinazarov mini traktor ixtiro qildi. Mini-traktor tirka va moslamalarni almashtirish hisobiga nafaqat shudgor ishlarini, balki chizellash, erni tekislash, ariq ochish, uni ko‘mish, shuningdek purkash va dorilashni ham amalga oshitish imkoniyatiga ega. 32 yildan buyon mutaxassisligi bo‘yicha faoliyat yurituvchi Hojinazarning ixtirosi 98 ot kuchiga ega bo‘lib sifat va samara jihatidan xorijnikidan qolishmaydi.

Propan gaz hisobiga ishlaydigan traktor yurayotgan paytida soatiga 30,35 km tezlikda harakatlanadi. Mini-traktor bir gektar bog‘ orasini 3 soat orasida haydab ulguradi. O‘rtacha 30 litr suyultirilgan propan gaz yoqadi. Zarurat bo‘lsa, kultivasiya ham qilish mumkin. Zanjirli traktorlarning asfalt yo‘lda harakatlanishi ta’qiqlangani bois, ixtirochi traktorni yuklab oluvchi maxsus g‘ildirakli treyler yaratdi. Bu o‘zi yurar texnologiyaga asoslangan bo‘lib, ustidagi mini-traktor haydovchisi tomonidan boshqariladi. Maxsus treyler traktordan bo‘shagan vaqtda ko‘chma dala shiyponi vazifasini o‘taydi.

Ixtirochi o‘z ixtirosini ilmiy jihatdan asoslash maqsadida Namangan shahar muhandislik texnologiya instituti bilan hamkorlikni yo‘lga qo‘ygan. Loyiha muallifi Respublika innovasion g‘oyalar, texnologiyalar va loyihalar yarmarkasida uning taqdimotini o‘tkazishni rejalashtirgan. Hozirda ixtiro uchun patent rasmiylashtirish ishlari amalga oshirilmoqda.

Manba: 1news.uz “Zamin” yangiliklarini “Twitter”da kuzatib boring