G‘ildiraklar yordamida harakatlanadigan robot bolakay ijtimoiy tarmoqlarni yana zabt etmoqda

^{Foto: Symbiotic Human-Robot Interaction Project}
Yapon olimlari tashqi ko‘rinishi bilan haqiqiy bolaga o‘xshaydigan, ammo asimmetrik g‘ildiraklarga ega o‘ziga xos platformada harakatlanadigan robotini yana taqdim etdi, deb xabar beradi Hi-Tech.Mail.ru.

Ibuki nomini olgan robot haqida ilk xabarlar internetda 2018 yilda paydo bo‘lgandi. Aynan o‘shanda Osaki universitetining taniqli muhandisi Xirosi Isiguro 10 yoshli bolaning yuziga ega androidni taqdim etgan edi.

Androidning karkasi uglerod va plastikdan ishlangan, yuz va qo‘l qismi kremniyli «teri» bilan qoplangan. Uning oyoqlari o‘rniga bir-birdan farq qiluvchi ikki g‘ildirakli platforma o‘rnatilgan. Asimmetrik g‘ildiraklari hisobiga harakat vaqtida robot «oqsoqlanadi» — tana qismining yuqori qismi insonning tabiiy harakat vaqtidagi holatini takrorlab, silkinadi.

^{Foto: Symbiotic Human-Robot Interaction Project}
Loyiha ustidagi ishlar 2014 yilda boshlangan bo‘lib, birinchi ishchi prototipni yaratishga 200 ming dollardan ortiq mablag‘ sarflangan. Ta’kidlanishicha, ayni vaqtida Ibuki sezilarli darajada yaxshilangan: unga atrofni yaxshiroq tanish imkonini beradigan yangi datchiklar o‘rnatilgan. Endilikda u «yuzlarni ko‘rishi», ularni skanerlashi va shu usulda boshqa buyumlarni tanishi mumkin.

Robot bolakay suhbat vaqtida yuzi orqali turli hissiyotlarni ifodalay oladi, masalan, baxt, hayrat, qo‘rquv yoki tushunish va hokazo. Ammo hozircha bu tabiiy mimikadan ancha farq qiladi, shu sababli ayrim kadrlarda uni qo‘rqinchli filmlardagi yovuz olimning ixtirosiga o‘xshatish mumkin.

^{Foto: Symbiotic Human-Robot Interaction Project}
Robot hissiyotlarining to‘liq spektri:

^{Foto: Symbiotic Human-Robot Interaction Project}
Ibuki sherik robot sifatida yaratilgan, ya’ni kelajakda u enaga o‘rnini egallashi yoki axborot uzatish stolida ishlashi mumkin. “Zamin” yangiliklarini “Odnoklassniki”da kuzatib boring