Ovoz ortiqcha yog‘dan xalos etadimi? Olimlar hayratda!

Zamonaviy parhezlar va shubhali ozdiruvchi preparatlar o‘rniga, tinglanayotgan musiqa tanadagi metabolizmga ta’sir qilishi mumkin — Yaponiyalik olimlar aynan shunday ilmiy xulosaga kelishdi.

Kioto universiteti olimlari qatorida tadqiqot olib borgan doktor Masahiro Kumeta ovoz — bu shunchaki shovqin emas, balki havo, suv va hatto inson to‘qimalaridan o‘tadigan tebranish ekanini ta’kidladi. Ushbu tabiiy resurs tibbiyotda yangi imkoniyatlar eshigini ochishi mumkin.

Qanday tadqiqot o‘tkazildi?

Kumeta jamoasi turli chastotadagi ovoz to‘lqinlarini mushak hujayralariga ta’sir ettirish orqali 42 ta genning faoliyati o‘zgarganini qayd etdi. Ular orasida yog‘ hujayralarining shakllanish jarayoni uchun javobgar bo‘lgan genlar ham bor. Ta’sir natijasida hujayralar yog‘ to‘plamaslikka moyil bo‘ldi.

Ajablanarlisi, kunlik ikki soat ovoz ta’siri ham natija berdi. Hatto yetuk hujayralarda ham yog‘ miqdori taxminan 15 foizga kamaygan.

Nima uchun bu muhim?

Bugungi kunda “akustik terapiya” surunkali og‘riq, yallig‘lanish va hatto shikastlangan to‘qimalarni qayta tiklashda qo‘llanila boshlagan. Yangi tadqiqotlar esa metabolizmni tartibga solish va ozish jarayonida ham tovush to‘lqinlaridan foydalanish mumkinligini ko‘rsatmoqda.

Stenford universitetidagi alohida jamoa esa ovoz orqali yurak hujayralarini qayta tiklash ustida ish olib bormoqda. Bu esa, akustika tibbiyotning yangi yo‘nalishlaridan biriga aylanishi mumkinligini tasdiqlaydi.

Kelgusi maqsadlar

Kumeta va uning guruhi endilikda tovush to‘lqinlarini aniq turdagi hujayralarga moslashtirish imkoniyatini o‘rganmoqda. Bu esa aniq yo‘naltirilgan, ta’siri kuchli va xavfsiz terapiya usullarini ishlab chiqishga xizmat qilishi mumkin.

Zamin.uz tahririyatidan:
Ozish va sog‘lom turmush tarzi sari qadam bosar ekanmiz, ehtimol bugundan sevimli musiqangizni naushnik orqali tinglash nafaqat kayfiyat, balki metabolizm uchun ham foydali ekanini unutmang. Siz ushbu “ovoz terapiyasi”ni sinab ko‘rgan bo‘larmidingiz? “Zamin”ni Telegramʻda oʻqing!