Singapurda odamlar o‘rtacha 86 yil umr ko‘radi

Singapurda odamlarning umr davomiyligi keskin oshib, mamlakat 2023-yilda dunyoning oltinchi “Ko‘k zona”si sifatida tan olindi. 1960-yillarda odamlar o‘rtacha 65 yil umr ko‘rgan bo‘lsa, hozir bu ko‘rsatkich 86 yilga yetgan. So‘nggi o‘n yilda yuz yoshdan oshgan aholining soni ham ikki barobar ko‘paygan.

Mutaxassislar buni hukumat olib borgan sog‘lom turmush tarziga oid siyosat bilan izohlaydi. Chekish va spirtli ichimliklarga solinadigan soliqlar, jamoat joylaridagi cheklovlar hamda oziq-ovqat mahsulotlariga qo‘yilgan maxsus yorliqlar odamlarning sog‘lom tanlov qilishiga yordam bermoqda.

Singapur sog‘liqni saqlash tizimi ham juda kuchli. 2023-yilda xalqaro reytinglarda mamlakat dunyoda birinchi o‘rinni egalladi. Bunda davlat sug‘urtasi, xususiy xizmatlar va aholining jamg‘armalari birga ishlaydi. Shu sababli tibbiy xizmat hamma uchun qulay va sifatli bo‘lib qolmoqda.

Yashash muhiti ham uzoq umr ko‘rishga ta’sir qilmoqda. “Bog‘ shahri” sifatida tanilgan Singapurda ko‘plab parklar, yashil hududlar bor. Bu joylarda odamlar jismoniy mashqlar qiladi, tabiat bag‘rida dam oladi va sog‘lom turmush tarzini davom ettiradi.

Biroq, Singapurda hayot juda qimmat. Shunga qaramay, mamlakatdagi barqarorlik, millatlararo totuvlik va boy madaniyat aholiga hamda sayyohlarga yaxshi hayot sifati yaratmoqda. Shu bois Singapur uzoq umr ko‘rish va sog‘lom hayot istaganlar uchun ibratli maskan sifatida e’tirof etilmoqda.