Lavanda yog‘i qadimdan inson salomatligi va go‘zalligi uchun ishlatib kelinadigan eng mashhur efir moylaridan biri hisoblanadi. Uning shifobaxsh xususiyatlari nafaqat aromaterapiyada, balki teri muammolarini bartaraf etish, uyquni tartibga solish, bosh og‘riqlarini yengillashtirish, soch salomatligini mustahkamlash va ruhiy holatni yaxshilashda ham keng qo‘llaniladi.
Mutaxassislarning ta’kidlashicha, lavanda yog‘ining antimikrob va antibakterial xususiyatlari uni psoriaz (toshbaqa kasalligi), akne (husnbuzar), allergiya va boshqa ko‘plab teri muammolariga qarshi samarali vositaga aylantiradi. Agar terida akne paydo bo‘lsa, bir tomchi lavanda yog‘ini bevosita ushbu joyga surtish mumkin. Shuningdek, uni kokos yog‘i bilan aralashtirib ishlatish akneni oldini olishda yordam beradi.
Lavanda yog‘ining yana bir muhim jihati — u teridagi ajinlarni kamaytiradi va yangi dog‘larning hosil bo‘lishini sekinlashtiradi. Uning tarkibidagi antioksidantlar teriga zarar yetkazuvchi erkin radikallarga qarshi kurashib, qarish jarayonini orqaga surishda yordamchi bo‘ladi. Shuningdek, terining elastikligini saqlab, uni yosh va sog‘lom ko‘rinishda ushlab turadi.
Shifobaxsh xususiyatlaridan biri sifatida lavanda yog‘idagi beta-kariofillin moddasi teridagi yaralarni tezroq bitishiga ko‘maklashadi. Bundan foydalanish uchun paxtaga bir necha tomchi lavanda yog‘ini tomizib, yara ustiga yengilgina surtish kifoya.
Uning yana bir noyob xususiyati — tinchlantiruvchi ta’siri. Lavanda yog‘i xidli tarkibi orqali nerv tizimini barqarorlashtirish, stressni kamaytirish va uyquni to‘g‘ri yo‘lga qo‘yishda yordam beradi. Shu bilan birga, u xasharotlar chaqishiga qarshi samarali vosita hisoblanadi. Lavanda yog‘ini teriga surtilsa, chivin va boshqa mayda hasharotlardan himoya qiladi, ularni uzoqlashtiradi. Agar hasharot chaqsa, uning asablantiruvchi ta’sirini yo‘qotish va qichishishni kamaytirishda ham yordam beradi.
“Zamin”ni Telegramʻda oʻqing!
