Ўзбекистонда дам олиш кунлари ҳаво кескин исийди: тафсилотлар

«Ўзгидромет» 26—27 апрель кунлари Ўзбекистонда кузатиладиган об-ҳаво ҳақида маълумот берди. Бу ҳақда ташкилотнинг расмий сайти хабар тарқатди.

Мутахассисларнинг маълум қилишича, мамлакат ҳудудида дам олиш кунлари ҳаво очиқ, айрим ҳудудларда эса қисман булутли бўлади. Бу кунларда ёғингарчилик кутилмайди. Шамолнинг тезлиги шарқ томондан сониясига 7-12 метрни ташкил этади, аммо баъзи вилоятларда чанғ-тўзон билан бирга сониясига 15-20 метргача кучайиши мумкин.

Ҳаво ҳарорати эса бутун мамлакат бўйлаб мунтазам равишда ошиб боради. Хусусан, жума куни кундузи 27-30 даража иссиқ кутилса, якшанба кунига келиб бу кўрсаткич 32-35 даражагача кўтарилади. Шимолий, жанубий ва чўл ҳудудларда эса ҳарорат янада юқори бўлиб, баъзи жойларда 36-39 даражага етиши тахмин қилинмоқда.

Пойтахт Тошкентда 25—27 апрель кунлари об-ҳаво асосан қуёшли бўлиб, ёғингарчилик кузатилмайди. Бугун, 25 апрель куни ҳаво ҳарорати кундузи 28-30 даража иссиқ бўлади. Шанба куни ҳарорат 30-32 даражага, якшанба куни эса 32-34 даражагача кўтарилади. Кечалари эса ҳаво ҳарорати 15-18 даража атрофида сақланиб қолади.

Умуман олганда, Ўзбекистонда ҳафта давомида ҳаво ҳарорати аста-секин кўтарилиб бораётгани кузатилмоқда. Об-ҳаво мутахассислари фуқароларни бу кунларда қуёш нуридан ҳимояланиш ва сув истеъмолини кўпайтиришни тавсия этишмоқда. «Замин»ни Telegram’да ўқинг!