Хоразмда ҳайдовчилик гувоҳнамасиз ўсмир ҳалокатли YTHда ҳалок бўлди

Хоразм вилоятида ёш ҳаёт яна фожеали тарзда узилди. 2024 йил 17 июнь куни кеч соатларида Боғот туманида 2007 йилда туғилган ўсмир ҳайдовчилик гувоҳномаси бўлмаган ҳолда автомашина бошқариб, ҳалокатли йўл-транспорт ҳодисасига учради. Бу ҳақда вилоят Йўл ҳаракати хавфсизлиги бошқармаси маълумот берди.

Расмий маълумотларга кўра, тунда тахминан соат 01:45 ларда Боғот тумани ҳудудида яшовчи Н.Ш. ўз бошқарувидаги Tico русумли енгил автомашинада ҳаракатланиб келаётган вақтда автомашинани юқори тезликда ҳайдаган ва натижада бошқарувни йўқотиб, йўл четига чиқиб кетган. Ҳодиса оқибатида машина ағдарилиб, ён томонга уриб тушган.

Афсуски, ўсмир ҳайдовчи олган оғир тан жароҳатлари туфайли ҳодиса жойида вафот этган.

Ҳозирда мазкур ҳолат юзасидан Боғот туман Ички ишлар бўлими тергов бўлими томонидан суриштирув ишлари олиб борилмоқда. Ҳодисанинг аниқ сабаблари, шу жумладан, нега гувоҳномасиз шахс тунда автомашина бошқаргани бўйича текширувлар ўтказилмоқда.

Мутасаддилар ўсмирлар ва ота-оналарни эҳтиёт бўлишга, ҳайдовчиликка оид қонунларга амал қилишга, болалар хавфсизлигини таъминлашга чақирмоқда. Бу каби ҳолатлар фақат битта оилани эмас, балки бутун жамиятни қайғуга солади. «Замин»ни Telegram’да ўқинг!