Вазирлар Маҳкамаси қарори билан электрон аукционлар орқали ер майдонларини сотиш ва кадастр соҳасида давлат хизматлари кўрсатиш тартиб-таомилларини такомиллаштириш юзасидан қўшимча чора-тадбирлар белгилаб берилди. Янги ҳужжат мамлакатда тадбиркорлик фаолияти ва шаҳарсозлик ишларини янада жонлантиришга қаратилган.
Қарорга кўра, қишлоқ хўжалигига мўлжалланмаган ер майдонлари устидан назорат тизими мустаҳкамланади. Шунингдек, ижара ҳуқуқи асосида сотиб олинган ерларни бирлаштириш имконияти яратилади. Бу ўзгаришлар ер-ҳуқуқий муносабатларда барқарорликни таъминлаш ва кичик саноат зоналари ҳамда ёшлар саноат-тадбиркорлик ҳудудларида инвестиция муҳитини яхшилашга хизмат қилади.
Янги тартибга кўра, аҳоли учун давлат хизматларини соддалаштириш, ортиқча бюрократик тўсиқларни йўқотиш ва қулай шароит яратиш мақсадида қатор ислоҳотлар амалга оширилади. Жумладан, саноат зоналари дирекциялари электрон онлайн-аукционларда ер майдонларини сотишда буюртмачи сифатида тан олинади.
2025 йил 5 сентябрдан бошлаб олис ва чўл ҳудудларда жойлашган ёшлар тадбиркорлик зоналаридаги бўш ер участкалари электрон онлайн-аукцион орқали символик равишда 1 сўм нархида савдога қўйилади. Бу жараён Yerelektron автоматлаштирилган ахборот тизимида алоҳида бўлим орқали амалга оширилади.
Кўп квартирали уй-жойлар қуриш учун ер майдонини қўлга киритган аукцион ғолиби ҳокимият билан электрон шартнома тузади. Унга кўра:
-
лойиҳаолди ҳужжатларини тайёрлаш учун 15 кун,
-
лойиҳа ишларини амалга ошириш учун 2 ой,
-
қурилишни бошлаш учун 3 ой муддат белгиланади.
Агар талаблар бажарилмаса, ер майдони белгиланган тартибда қайтариб олиниб, қайта савдога чиқарилади.
Шунингдек, аукционларда сотиб олинган ерларда қурилиш жараёнлари «Онлайн маҳалла» электрон платформаси орқали мунтазам назорат қилинади. Ушбу механизм қурилиш бошланишидан то объект фойдаланишга топширилгунига қадар барча босқичларни шаффоф кузатиш имконини беради.
Янги ислоҳотлар орқали тадбиркорлар ва аҳоли учун ердан фойдаланиш жараёни анча енгиллашиши ҳамда мамлакатда қурилиш ва инвестиция муҳитини янада кучайтириши кутилмоқда.
