Вашингтондаги Оқ уйда 6 ноябрь куни бўлиб ўтган учрашув дўстона ва самимий руҳда ўтди. Ўзбекистон президенти Шавкат Мирзиёев АҚШ раҳбари Доналд Трамп билан мулоқот чоғида мамлакатлар ўртасидаги муносабатларни янада мустаҳкамлашга қаратилган бир қатор ташаббусларни муҳокама қилди. Суҳбат якунларида эса Ўзбекистон етакчиси америкалик ҳамкасбига икки рамзий совға — Самарқанддаги Регистон мажмуасининг миниатюра нусхаси ва Трампнинг ўзбек тилига таржима қилинган “Келишиш санъати” китобини тақдим этди.
Оқ уй матбуот хизмати тарқатган расмларда кўриниб турибдики, бу совғалар Трамп томонидан катта қизиқиш билан қабул қилинган. Айниқса, Регистоннинг кичик модели — ўзининг тарихий ва маданий аҳамияти билан Ўзбекистоннинг кўп асрлик меросини ифодалайдиган белги сифатида қимматли рамз ҳисобланади. Президент Мирзиёев бу орқали икки давлат ўртасидаги маданий яқинлик ва ўзаро ҳурматни намоён этди.
Шунингдек, Трампга тақдим этилган “Келишиш санъати” (“The Art of the Deal”) асари ўзбек тилидаги нашри давлат раҳбарларининг мулоқотига ўзгача маъно қўшди. Бу китоб Трампнинг сиёсий ва ишбилармонлик тажрибасини акс эттиради, Мирзиёев эса уни миллий тилдаги нусхада тақдим этиб, маданий мулоқот ва китобат дипломатияси орқали ўзаро яқинликни янада кучайтиришга урингани кузатилди.
Қизиқ жиҳати шундаки, суратларда Марказий Осиё – АҚШ мулоқоти доирасида Вашингтонга ташриф буюрган бошқа давлат етакчилари Трампга совға бергани кўринмаган. Бу ҳолат Мирзиёевнинг ташрифини ва унинг шахсий ташаббусини янада ажратиб кўрсатди.
Учрашувда Мирзиёев Трампни такрор ва такрор Ўзбекистонга ташриф буюришга таклиф этди. Президент сўнгги йилларда ҳар бир мулоқотда америкалик ҳамкасбига Самарқандни кўришни таклиф қилиб келган, бу гал эса расман 2026 йилдаги навбатдаги С5+1 саммитини Самарқанд шаҳрида ўтказиш ташаббусини илгари сурди.
Мирзиёевнинг бу таклифи АҚШ раҳбарининг Марказий Осиёга илк ташрифи бўлиши мумкин. Таъкидлаш жоизки, ҳозиргача бирор АҚШ президенти бу минтақада расмий ташриф билан бўлгани йўқ. Шу боис, бундай қадам тарихий аҳамият касб этади.
Вашингтондаги мулоқот нафақат икки давлат муносабатларида янги саҳифа очди, балки Ўзбекистон дипломатиясининг янги даражадаги фаоллигини ҳам кўрсатди. Мирзиёев томонидан берилган рамзий совғалар мамлакатнинг маданий қудрати ва дипломатик мулойимлигини ифодалаб, Трамп билан мулоқотни дўстона руҳда мустаҳкамлади.
Шу тариқа, Оқ уйдаги учрашув нафақат сиёсий аҳамият касб этди, балки ўзбек анъанавий меҳмондўстлиги ва дипломатик самимиятнинг ёрқин намунасига айланди.
“Zamin”ни Telegram'да ўқинг!
