Президент Шавкат Мирзиёев мамлакатда юқори малакали кадрлар тайёрлашни янги босқичга олиб чиқишга қаратилган муҳим ҳужжат — «Ўзбек–Француз университетини ташкил этиш чора-тадбирлари тўғрисида»ги қарорни имзолади. Мазкур қарор Ўзбекистон ва Франция ўртасидаги таълим соҳасидаги ҳамкорликни янада мустаҳкамлаш, замонавий таълим стандартларини жорий этиш ва ёшлар учун халқаро мезонларга жавоб берувчи имкониятлар яратишни мақсад қилади.
Қарорга мувофиқ, Ўзбек–Француз университети ташкил этилади ва у ўз фаолиятини мамлакат қонунчилиги ҳамда Франция университетлари консорциуми томонидан ишлаб чиқилган тавсиялар асосида йўлга қўяди. Бу эса университет таълим тизими жаҳон андозаларига мос равишда шакллантирилишини таъминлайди.
Мазкур олийгоҳда дастлаб магистратура йўналишларида ўқув жараёни бошланади. Кейинчалик талаб юқори бўлган соҳалар бўйича босқичма-босқич бакалавриат ва докторантура дастурлари ҳам очилиши режалаштирилган. Шу билан бирга, абитуриентлар учун махсус тайёрлов курслари жорий қилиниб, уларни қабул жараёнига пухта тайёрлашга эътибор қаратилмоқда.
Таълим жараёни мақсадли давлат грантлари ва тўлов-контракт асосида амалга оширилади. Энг муҳим жиҳатлардан бири — битирувчиларга икки хил имконият тақдим этилади: уларга ўз университети дипломи билан бир қаторда консорциумга кирган Франция университетларидан бирининг аккредитациядан ўтган таълим дастури бўйича дипломи ҳам берилиши мумкин. Яъни, битирувчи икки давлат стандартларига мос, халқаро етук даражадаги ҳужжатга эга бўлади.
Ушбу дипломлар Ўзбекистон ҳудудида тўлиқ тан олинади. Бу эса талабалар учун фақат давлат ичида эмас, балки хорижда ҳам иш, илмий фаолият ва ўқиш имкониятларини кенгайтириб беради.
Янги университетнинг ташкил этилиши мамлакат олий таълим тизимида яна бир муҳим қадам бўлиб, ёшларга халқаро ҳамкорлик асосида мукаммал билим, замонавий ёндашув ва амалиётга яқинлашган таълим муҳитини тақдим этади.
“Zamin”ни Telegram'да ўқинг!
Меҳмон гуруҳидаги фойдаланувчилар ушбу мақолага изоҳ қолдира олмайди.
