Ўзгидромет маълумотларига кўра, 23–25 декабр кунлари мамлакат ҳудудларида ҳаво ҳарорати босқичма-босқич кўтарилиб, кундуз кунлари +5…+10 даражагача етади. Қишнинг охири эмас, лекин совуқ ҳам секин орқага чекинаётгандек.
Душанба куни республика ҳудудининг катта қисмида осмон очиқ бўлиши, фақат кун давомида тоғолди ва тоғли ҳудудларда ёмғир ёки қор кўринишида қисқа муддатли ёғингарчилик бўлиши мумкин.
23–24 декабр кунлари аксарият ҳудудларда ёғингарчилик кутилмайди. Фақат Тошкент вилояти ва Фарғона водийсида 23 декабрь кечаси ва эрталаб айрим жойларда енгил қор ёғиши эҳтимоли сақланиб қолади.
25–26 декабр кунлари эса Қорақалпоғистон Республикаси ва Хоразм вилоятида вақт-вақти билан асосан қор шаклидаги ёғингарчилик кузатилади. 26 декабр куни Тошкент вилоятининг айрим ҳудудларида ҳам ёмғир ёки қор ёғиши мумкин. Қолган ҳудудларда эса ҳаво нисбатан барқарор бўлади.
Ҳарорат режимига келсак, кечалари –3…+2 даража атрофида бўлади. Кундузи 22 декабрда ҳаво 0…+5 даражагача илиқлашса, 23–25 декабр кунлари +5…+10 даражагача кўтарилади. 26 декабрда эса кундузги ҳарорат яна +2…+7 даражагача пасайиши мумкин.
Шамол асосан шарқ томондан енгил ёки ўртача тезликда эсади. Айрим ҳудудларда туман тушиши эҳтимоли бор. 22–23 декабр кунлари йўлларда маҳаллий яхмалак ҳолатлари кузатилиши мумкин, айниқса тоғли ҳудудларда эҳтиёткорлик талаб этилади. Бу ерларда қор ёғиши ва қор кўчиши хавфи ҳам сақланиб қолмоқда.
Тошкент шаҳрида 22–25 декабр кунлари асосан ёғингарчиликсиз об-ҳаво кутилмоқда. Фақат 23 декабрь кечаси енгил қор ёғиши мумкин. Кечалари ва эрталаб туман тушиши эҳтимоли бор. Шамол 3–8 м/с тезликда эсади. Кундузги ҳарорат 22 декабрда +2…+4 даража, 23–25 декабр кунлари эса +7…+9 даражагача кўтарилади. 26 декабрда эса ёмғир эҳтимоли билан бирга ҳарорат бироз пасаяди.
Қисқаси, ҳафта боши илиқроқ кайфиятда ўтади, лекин йўлга чиқишда ва тоғли ҳудудларда ҳаракатланишда ҳушёрлик ҳали ҳам шарт.
“Zamin”ни Telegram'да ўқинг!
Меҳмон гуруҳидаги фойдаланувчилар ушбу мақолага изоҳ қолдира олмайди.
