18:41 / 22.08.2019
2 982

1 ноябрдан ҳисоблагичларни қиёсловдан ўтказиш кечиккани учун жарима қўлланмайди

1 ноябрдан ҳисоблагичларни қиёсловдан ўтказиш кечиккани учун жарима қўлланмайди

2019 йил 1 ноябрдан бошлаб фуқаролар ҳисоблагичларини қиёсловдан ўтказиш ва таъмирлатиш учун ўзлари олиб бормайди. Бу ўзгариш ҳақида «Ўзстандарт» агентлиги мутасаддилари иштирокида Ахборот ва оммавий коммуникациялар агентлигида ўтказилган матбуот анжуманида маълумот берилди.

«Қиёслаш билан боғлиқ муаммолар кўп кўзга ташланаётган эди. Чунки айрим ҳолларда «Энерготаъминот» ходими келиб вақтида қиёсловдан ўтмабди, деган мазмунда жаримага тортиб кетарди. Фуқаролар ҳисоблагични кўтариб ўзлари мутасадди ташкилотларга қиёслов учун бориши ҳам кўпчилик учун ёқимли ҳолат эмас эди.

Энди эса «Энерготаъминот» огоҳлантиргандан сўнг фуқаро ишини битта электрон буюртма юбориш орқали ҳал қилади. Буюртмани ўзи онлайн юбора олмаганлар эса Давлат хизматлари марказига мурожаат қилади. Ва у ерда фуқаронинг номидан ариза тизимга киритиб берилади.

Ҳисоблагични ечиш, қиёслаш, уни ўрнатиш энергия таъминот корхоналари зиммасига тушади», дея ушбу имкониятнинг мазмуни ҳақида маълумот бериб ўтди «Ўзстандарт» агентлиги бош директори Дилшод Сатторов.

Бундан ташқари, Дилшод Сатторовнинг қайд этишича, агар ҳисоблагичларда носозлик қайд этилиб, фуқаро ариза берадиган бўлса, энергия етказиб берувчи ташкилотлар уни алмаштириш ёки тузатиш каби ҳолатларнинг барчасига тўлиқ жавобгар бўлади.

Қиёслашдан ўтказиш муддати ҳам 1 ноябрдан узайтирилиши белгилаб қўйилган. Унга кўра, фуқаролар ҳар 8 йилда (илгари 4 йилда эди), тадбиркорлар 4 йилда (олдин 2 йилда), янгича тизим асосида ҳисоблагич ўрнатганлар эса 10 йилда 1 марта ҳисоблагичларини қиёсловдан ўтказишлари керак бўлади.

«Қиёсловдан ўтказиш учун фуқаро бир марта тўлов қилади. Шунинг ўзи билан ҳисоблагични таъмирлаш ёки алмаштириш каби зарур амаллар бажарилади. Агар қиёслов муддати ўтган бўлса ҳам, ҳеч ким уни олдингидай жаримага тортмайди», дейди «Ўзстандарт» агентлиги бош директори.

Шунингдек, матбуот анжуманида ҳозир «Ўзтсандарт» агентлигига келиб тушаётган мурожаатларнинг асосий фоизи ҳисоблагичлар билан боғлиқлиги, 1 ноябрдан ишга тушадиган янги тизим эса ташкилотнинг ишини осонлаштириш ва имижини яхшилашга ёрдам бериши мумкинлиги айтиб ўтилди.

Dasturlash foundation


Ctrl
Enter
Хато топдИнгизми?
Иборани ажратиб Ctrl+Enter тугмасини босинг
Янгиликлар » Ўзбекистон » 1 ноябрдан ҳисоблагичларни қиёсловдан ўтказиш кечиккани учун жарима қўлланмайди