Интим ҳаётга оид маълумотларни ошкор қилганлик учун жиноий жавобгарлик белгиланиши кутилмоқда

«Оила ва хотин-қизларни тизимли қўллаб-қувватлашга доир ишларни янада жадаллаштириш чора-тадбирлари тўғрисида»ги президент фармонига кўра, Адлия вазирлиги, Бош прокуратура, Олий суд, ИИВ ва Хотин-қизлар ва оила ишлари қўмитаси 2022 йил 1 июнга қадар қуйидагилар назарда тутилган қонун лойиҳасини Вазирлар Маҳкамасига киритиши лозим:

• шахс ҳаётининг сир тутиладиган томонларини акс эттирувчи, шаъни ва номусини камситувчи маълумотларни ошкор қилганлик учун жиноий жавобгарликни белгилаш;
  
• аёлни ўз ҳомиласини сунъий равишда туширишга мажбурлаганлик учун жавобгарликни кучайтириш;
  
• яқин қариндоши бўлган хотин-қизга қасддан тан жароҳати етказганлик учун жавобгарликни кучайтириш;
  
• тазйиқ ва зўравонликдан жабрланувчига давлат ҳимоясини тақдим этувчи ордер суд томонидан бир йил муддатгача берилишини белгилаш;
  
• икки ойдан ортиқ муддат мобайнида моддий ёрдамга муҳтож бўлган вояга етмаган ёки меҳнатга лаёқатсиз шахсни моддий таъминлашдан бўйин товлаган шахсга нисбатан ҳақ тўланадиган жамоат ишларига ёки бошқа ишга мажбурий жалб қилиш тарзидаги маъмурий ҳуқуқбузарликка оид жазо турини белгилаш,
  чет эл фуқароси Ўзбекистон ҳудудида алимент мажбуриятларини бажармаганлик учун судланган ёки маъмурий жавобгарликка тортилган бўлса, унга нисбатан Ўзбекистондан чиқариб юбориш ва Ўзбекистонга кириш ҳуқуқини чеклаш бўйича мажбурлов чораларини қўлламаслик.

Президентнинг ушбу фармони билан, шунингдек, давлат органлари раҳбарларининг камида бир нафар ўринбосари аёл кишидан тайинлаш, давлат ОТМларида магистратурада ўқиётган барча хотин-қизларнинг контракт тўловларини қоплаб бериш, «Ибратли оила» кўкрак нишони таъсис этиш белгиланган. “Замин” янгиликларини “Twitter”да кузатиб боринг