Наманган ҳокими ноқонуний радарларни олиб ташлашни сўради

Наманган шаҳар ҳокими Анвар Отахўжаев ноқонуний ўрнатилган радарлар фуқароларга зарар етказаётганини таъкидлаб, уларни демонтаж қилишни талаб қилди, деб Podrobno.uz хабар берди. У мазкур масала юзасидан 12 апрель куни Йўл ҳаракати хавфсизлиги вилоят бошқармаси бошлиғи Мансур Ғозиев номига расмий хат йўллади.

Шаҳар раҳбари хатда айтилишича, меъёрларга зид равишда ўрнатилган радарлар аҳоли орасида нафақат молиявий зарар, балки ортиб бораётган норозиликни ҳам келтириб чиқармоқда. Бу эса мамлакатдаги сиёсатга нисбатан ишончсизлик уйғотиб, ижтимоий тармоқларда кескин танқидларга сабаб бўлмоқда.

Отахўжаевнинг таъкидлашича, аҳоли билан учрашувларда айнан талабларга риоя этилмаган ҳолда ўрнатилган радарлар орқали белгиланган жарималар юзасидан кўплаб шикоятлар келиб тушмоқда. Айниқса, камераларнинг бино томлари ёки ёритиш устунларига ўрнатилиши аҳолида эътироз уйғотмоқда.

Ҳоким ушбу камераларни тизимдан чиқариш, улар орқали қайд этилган қоидабузарликлар учун жарималарни бекор қилиш ва бу чораларни Наманган шаҳри ҳамда Давлатобод ва Янги Наманган туманларида амалга оширишни сўраган. «Замин»ни Telegram’да ўқинг!