Дизайни йўқ автомобиль ёки қутимобиль

Автомобиль ҳаракатланиш воситаси бўлибгина қолмасдан, муайян эстетик талабларга жавоб бериши зарур. Автомобиль дизайни харидорни жалб этувчи хусусиятлардан биридир, аммо америкалик дизайнер Жоуи Рюйтер бирдан бу мезонга риоя қилишни истамай қолди.

Дизайнер қутига ўхшаш, мутлақо ўзига хос автомобиль прототипини тайёрлади ва унга Consumer номини берди. “Консюмер” катта шаҳарларда минишга мўлжалланган. Дизайнернинг айтишича, уни тирналишидан чўчимасдан автотураргоҳга жойлаш мумкин. Чунки қабариб чиққан ва нозик жойлари йўқ, деб мақтайди машина муаллифи.

Кузов тўғри бурчакли. Салонида хиёбондаги ёғоч ўриндиқларни эслатадиган икки диван ва бошқарув ускуналари бор. Олд қисмига кўзгусимон панел қопланган бўлиб, остидаги диод чироқлар фара вазифасини бажаради. Автомобиль ғилдираклари кузов панеллари остига яширинган бўлиб, гўёки текисликда сирғалиб кетаётгандек тасаввурни юзага келтиради.

Кузовнинг олд юқори қисми нотекис металл панелдан иборатдир. Уни капот каби очиб двигатель ва олд ғилдиракларни кўрасиз. Орқа қисмига пишиқ мато қопланган. Ягона декоратив элементлари бензобак қопқоғи ва биқинидаги оёқ қўядиган зиначаларидир, десак хато қилмаймиз. Унга оёқ қўйиб машина ичига тушилади. Ҳа, айнан тушилади, кириш имкони йўқ, чунки эшиги мавжуд эмас.


“Истеъмолчи”нинг (Consumer) ғилдираклар базаси 2,28 м, узунлиги 3,42 м, баландлиги бор йўғи 83 см. Кўплаб одатдаги элементлари, ҳаттоки, томи йўқлиги сабабли вазни 566 кг холос. Қолган техник тавсифи келтирилмади. Аслида бунинг ҳожати ҳам йўқ. Чунки унинг ялпи ишлаб чиқарилиши эҳтимоли жуда узоқ.
“Замин” янгиликларини “Одноклассники”да кузатиб боринг