Америкалик машҳур электромобил ишлаб чиқарувчи Tesla компанияси 6197 дона Cybertruck электромобилини қайтариб олишини эълон қилди.
АҚШ Миллий йўл ҳаракати хавфсизлиги бошқармаси (NHTSA) баёнотига кўра, қайтариб олиш 2024-йилда ишлаб чиқарилган ва йўлдан ташқарида кўринишни яхшилаш учун махсус ёруғлик панели ўрнатилган моделларга тегишли.
Регуляторнинг маълум қилишича, айрим автомобилларда ушбу ёруғлик панели нотўғри ўрнатилган ёки бириктирилиш жараёнида астарланишда хато юзага келган бўлиши мумкин.
“Бундай ҳолат панелнинг олд ойнадан ажралиб чиқишига олиб келиши, бу эса бошқа йўл фойдаланувчилари учун хавф туғдириши мумкин,” — дейилади NHTSA баёнотида.
Tesla компанияси ушбу техник камчиликни бепул бартараф этиш мажбуриятини олган ва тегишли транспорт воситаларини сервис марказларига чақира бошлаган.
“Zamin”ни Telegram'да ўқинг!
