Россиянинг "АвтоВАЗ" компанияси йилига 70 минг донагача Лада Азимут кроссоверини ишлаб чиқаришни режалаштирмоқда. Ушбу модел "Веста" платформаси негизида яратилган бўлиб, унинг учун мингга яқин оригинал компонентлар, жумладан, янги кузов панеллари ва орқа осма тизими ишлаб чиқилган. Бу ҳақда Ixbt.com хабар беради.
Автомобилнинг серияли ишлаб чиқарилиши 2026-йилнинг сентябрь ойига мўлжалланган. Дастлабки босқичда кроссовер 1,6 ва 1,8 литрли атмосферали двигателлар, 6 поғонали механик узатмалар қутиси ёки вариатор билан таклиф этилади. Кейинчалик 150 от кучига эга турбомоторли ва классик автомат узатмали версиялар ҳам пайдо бўлади.
Шунингдек, компания Лада Азимут негизида гибрид моделни ҳам ишлаб чиқмоқда. 2026-йилнинг учинчи чорагида тақдим этилиши кутилаётган ушбу версия 394 от кучи қувватга, тўлиқ узатмалар тизимига ва 1100 километргача масофани босиб ўтиш имкониятига эга бўлиши айтилмоқда.
Янги кроссовер жиҳозланиши бўйича ҳам ажралиб туради. Модел 10 дюймли медиа тизим экрани, панорамали том ва олдинги ён ойналарни иситиш тизими каби қулайликлар билан таъминланади.
“Zamin”ни Telegram'да ўқинг!
