Пойтахтда бўлиб ўтган КОМвех кўргазмасида йирик автомобил премераси ўтказилди: AvtoVAZ компаниясининг сертификатланган ҳамкори ҳисобланган «Proмтех» корхонаси СКМ М9 тижорат транспорти моделини расман намойиш этди. СКМ бренди AvtoVAZга тегишли бўлиб, янги оилага мансуб автомобилларни Нижний Новгород ва Толятти шаҳарларидаги қувватларда ишлаб чиқариш режалаштирилган. Бу ҳақда Ixbt.com хабар беради.
СКМ М9 моделининг барча версиялари олд узатмали бўлиб, 150 от кучига эга 2,0 литрли дизел двигатели билан жиҳозланган. Харидорларга икки турдаги трансмиссия танлови таклиф этилади: 6 поғонали механик узатмалар қутиси ёки замонавий 9 поғонали автомат узатмалар қутиси. Автомобилнинг рухсат этилган максимал вазни 3500 кг ни ташкил этади ва у 80 литрли ёнилғи баки билан таъминланган.
Янги моделнинг базавий жиҳозларидан 12,3 дюймли экранли мультимедиа тизими, иқлим назорати, круиз-контрол, электрон тўхташ тормози ҳамда хавфсизлик тизимлари мажмуаси (ЭСП, ЭБА, ҲҲК, АБС, ЭБД) ўрин олган. СКМ М9 линияси бозорда тўрт хил кўринишда дебют қилади, улардан учтаси йўловчи ташишга мўлжалланган бўлиб, корпоратив мижозлар ва туристик сафарлар учун қулайдир.
Йўловчи версиялари орасида 7 ўринли «Бизнес» минивени, юкхонаси кенгайтирилган 8 ўринли «Трансфер» ҳамда 9 кишига мўлжалланган шинам «Комфорт» микроавтобуси мавжуд. Шунингдек, бизнес ва логистика эҳтиёжлари учун юк бўлмаси ҳажми 9,6 кубометр бўлган бутунлай металл фургон модификацияси ҳам ишлаб чиқилган бўлиб, у йирик ҳажмдаги товарларни етказиб беришга ихтисослашган.
“Zamin”ни Telegram'да ўқинг!
