19:23 / 07.05.2021
1 706

Citroen компанияси Lada Granta нархидаги митти электрофургонни тақдим этди (фото)

Citroen компанияси Lada Granta нархидаги митти электрофургонни тақдим этди (фото)

Фото: Citroen
Citroen компанияси ихчам Аmi квадрациклининг тижорий версиясига айланган My Ami Cargo электрокарини тақдим этди. Саккиз от кучига эга двигатель ўрнатилган мазкур фургонча нархи 6490 доллардан бошланади. Бу пулга ҳамёнбоп Lada Granta харид қилиш мумкин, деб хабар беради Motor.

Юк ва йўловчиларни ташишга мўлжалланган Citroen Аmi фургонини қайта ишлаш жараёнида унинг битта ўриндиғи олиб ташланиб, ўрнини 260 литрлик пластик бокс сиғадиган икки поғонали пол эгаллаган. Ишчи юза вазифасини бажарувчи ечиладиган қопқоғи 40 килограммгача юкни кўтаришга қодир.

Фото: Citroen
Шунингдек, электрокарнинг орқа қисмида яна бир бўлмача мавжуд, My Ami Cargo’га узунлиги 1,2 метргача, ҳажми эса 400 литргача юкни жойлаштириш мумкин. Ҳамёнбоп фургондан, шунингдек, турли чўнтаклар, тўрлар, юкхона учун камарлар ўрин олган. My Ami Cargo’нинг хавфсизлик ёстиқчаси йўқ, бироқ максимал тезлиги ҳам юқори эмас — соатига 45 километр.

Фото: Citroen
Автомобиль саккиз от кучига эга электромотор билан жиҳозланган. Сиғими 5,5 киловатт/соатга тенг аккумулятор ёрдамида бир марта қувватланиш орқали 75 километр йўл боса олади. Маиший электр тармоғи ёрдамида уни 3 соатда тўлиқ қувватлантириш мумкин.
Citroen’нинг маълум қилишича, ихчам фургондан пандемия шароитида турли етказиб бериш хизматларида фойдаланиш мумкин. Велосипедлардан фарқли ўлароқ у ёмғирдан ҳимояланган ва зарурат туғилган совуқ ҳавода иситиш тизимига ҳам эга.

Фото: Citroen
Citroen My Ami Cargo Франция бозорида 2021 йилнинг июнидан сотувга чиқади. Уни бирданига харид қилиш ёки узоқ муддатга ижарага олиш мумкин.

Ctrl
Enter
Хато топдИнгизми?
Иборани ажратиб Ctrl+Enter тугмасини босинг
Фикрлар (0)


Янгиликлар » Авто » Citroen компанияси Lada Granta нархидаги митти электрофургонни тақдим этди (фото)