Россияликлар маълумотини маҳаллийлаштиришдан бош тортган Apple жаримага тортилди

^{Фото: IMAGO}
Москва суди Американинг Apple Inc. корпорациясини россиялик фойдаланувчиларнинг маълумотларини маҳаллийлаштиришдан бош тортгани учун 2 миллион рубль жаримага тортди, деб хабар берди 12 июль, сешанба куни суд залидан «Интерфакс» ва ТАСС мухбирлари. Apple ушбу модда бўйича Россия Федерацияси ҳудудида биринчи марта жавобгарликка тортилди.

Мажлисда компания вакиллари корпорация Россияда маълумотлар йиғиш учун жавобгар эмаслигини, бу билан бошқа компания - Apple Distribution Ltd шуғулланаётганини таъкидлади. Роскомнадзор вакили шахсий маълумотларни қайта ишлаш бўйича ваколат Apple Distribution’га топширилганига қарамай, Apple Inc. уларни тўплаш учун жавобгар эканлигини билдирди.

Россия қонунчилигига кўра, россиялик фойдаланувчиларнинг шахсий маълумотларини қайта ишловчи рус ва хорижий компаниялар уларни фақат мамлакат ҳудудида сақлаши керак.

12 июль куни худди шу суд Speedtest интернет тезлигини ўлчаш хизматига эгалик қилувчи Американинг Ookla компанияси ва видео-конференц-алоқа хизмати эгаси Американинг Zoom Video Communications Inc.’ни Россияда маълумотларини маҳаллийлаштиришдан бош тортгани учун жаримага тортди. Улар 1 миллион рубль миқдорида жарима тўлашлари керак.

Бундан ташқари, фрилансерлар билан ишлаш бўйича Freelancer.com хизматига эга бўлган Австралиянинг Freelancer International Pty Limited компанияси ва Tinder танишув сайтининг эгаси Американинг Match Group LLC учун ҳам шунга ўхшаш протоколлар тузилаётгани маълум бўлди.

Аввалроқ Pinterest фотохостинги, турар жойни ижарага олиш бўйича Airbnb сервиси, Twitch стриминг хизмати, Американинг United Parcel Service тезкор етказиб бериш компанияси ва Google интернет гиганти худди шу модда бўйича жаримага тортилган эди. “Замин” янгиликларини “Инстаграм”да кузатиб боринг