Ҳелсинкида СССР томонидан ҳадя қилинган «Бутун дунёда тинчлик» монументи демонтаж қилинди

^{Фото: Shutterstock}
Ҳелсинкида совет иттифоқининг Финландияга совғаси бўлган «Бутун дунёда тинчлик» монументи демонтаж қилинди. Бу ҳақда 8 август, душанба куни маҳаллий Yle телекомпанияси маълумот берди.

Унинг маълумотига кўра, Хаканиеменранта кўчасида турган ёдгорлик эрталаб пойдевордан олиб ташланган, баржага ортилган ва шаҳар санъат музейи омборига жўнатилган. Унинг келажакдаги тақдири кейинчалик музей раҳбарияти ва Ҳелсинки мэрияси томонидан белгиланади. Шаҳар ҳокимлиги ёдгорликни олиб ташлаш қарорини кўча ва унга туташ майдонда ҳаракатни қайта ташкил этиш билан изоҳлади. Унинг ўрнига пиёдалар йўлаги ётқизилади.

Совет ҳайкалтароши Олег Кирюхин томонидан ишланган, 6,5 метр баландликдаги «Бутун дунёда тинчлик» бронза композициясида турли қитъалардан келган одамлар кўтарилган қўлларида новдалар билан ҳошияланган глобусни ушлаб турган ҳолда тасвирланган. Москва Ҳелсинкига ёдгорликни 1989 йилда совға қилган ва унинг очилиши 1990 йил январида, Берлин девори қулаганидан кўп ўтмай юз берган. У бир неча бор баҳс-мунозараларга сабаб бўлган ва вандалларнинг ҳужумига учраган. Ёдгорликни демонтаж қилиш зарурлиги ҳақидаги баҳслар сўнгги ойларда Россиянинг Украинага ҳарбий бостириб кириши фонида авж олди.

Уруш бошланганидан кейин Болтиқбўйи мамлакатларида СССР давридаги ёдгорликлар ҳам оммавий равишда демонтаж қилина бошлади. 4 август куни Эстония ҳукумати «имкон қадар тезроқ» барча совет обидаларини жамоат жойларидан олиб ташлашга қарор қилди. Турли маълумотларга кўра, мамлакатда 200 тадан 400 тагача бундай ёдгорликлар мавжуд.

Аввалроқ, Латвия совет ёдгорликлари ва монументларидан халос бўлишга қарор қилганди, хусусан, Ригада совет аскарлари ёдгорлигини бузишга қарор қилинди. Ригадан сўнг, мамлакатнинг бошқа шаҳарларида ҳам ёдгорликлар олиб ташланмоқда ёки кўчирилмоқда, уларни совет истилосининг рамзлари деб аташади. «Замин» янгиликларини «Вконтакти»да кузатиб боринг