Қозоғистонда январь воқеалари иштирокчилари афв этилади

Қозоғистонда январь ойида рўй берган намойишларда иштирок этганларга бир марталик амнистия қўлланилади. Бу ҳақда Қозоғистон Республикаси Президенти Қосим Жўмарт Тоқаев Қозоғистон халқига Мурожаатномасида айтиб ўтди.

«Бизга миллий бирлик ҳаводек зарурдир. Намойишларда қатнашганлар ҳам, куч тузилмаси ходимлари ҳам бизнинг фуқароларимиз. Улар нафақат суд адолатли бўлишига, балки жамият кечиримли бўлишига ҳам умид қиладилар. Давлат январь воқеаларида иштирок этган, аммо оғир жиноят содир этмаган фуқароларнинг жазосини енгиллаштирди. Қонунни бузганларнинг айримлари ўз айбларини англаб, ўтган қилмишларидан пушаймон бўлишди. Менимча, уларга кечиримли муносабатда бўлиш яхшироқдир. Шунинг учун мен январь воқеалари иштирокчиларига бир марталик амнистия эълон қилишга қарор қилдим», — дея таъкидлади Қозоғистон Президенти.

Давлат раҳбарининг сўзларига кўра, оммавий тартибсизликлар уюштиришда иштирок этган асосий гумонланувчилар, шунингдек, давлатга хиёнат қилиш ва ҳокимиятни куч билан эгаллаб олишда айбланаётган шахсларга нисбатан амнистия қўлланилмайди.

Шунингдек, январь воқеаларида ҳалок бўлган фуқароларнинг кам таъминланган оилаларига моддий ёрдам кўрсатилади.

«Биз бу фожиадан инсонпарварлик кўрсатган ҳолда тегишли хулосалар чиқарамиз. Бу бошқа ҳеч қачон содир бўлмайди. Биз бунга йўл қўймаймиз. Январь воқеаларида ҳалок бўлган фуқароларнинг кам таъминланган оилаларига моддий ёрдам кўрсатилади. Қозоғистон халқини қўллаб-қувватлаш жамғармаси бундан буён ҳам ушбу хайрли ишга ўз ҳиссасини қўшишига ишонаман», — деган Тўқаев. «Замин»ни Telegram’да ўқинг!