Туркия президенти Ражаб Тоййиб Эрдўғон АҚШнинг PBS телеканалига берган интервьюсида Украина урушига доир умидбахш янгиликни тилга олди. Туркия раҳбарига кўра, Россия президенти Владимир Путин урушни имкон қадар тезроқ тугатиш ниятида.
«Ўзбекистонда мен президент Путин билан учрашдим. Иккимиз тиғиз музокаралар ўтдик. У мени чиндан ҳам буни (Украина уруши назарда тутилмоқда – таҳр.) имкон қадар тезроқ тугатиш ниятида эканига ишонтирди. Менинг таассуротим ана шундай. Ҳарқалай, вазият ўта мушкул томонга ўзгармоқда», – деган президент Эрдўғон.
PBS журналистининг «Уруш якунланса, Украинадан тортиб олинган ҳудудлар Россияда қолиши керакми?» деган мазмундаги саволига жавобан Туркия раҳбари Украина ҳудудлари қайтарилиши лозимлигини таъкидлаган.
Эрдўғон халқаро ҳуқуқ меъёрларига мувофиқ Қрим Украина ҳудуди экани, яриморол расмий Киев бошқарувига қайтарилиши кераклигини айтиб келади.
АҚШ телеканалига интервьюда ҳам Қрим масаласи кўтарилган.
«Биз ундан (Путин назарда тутилмоқда – таҳр.) Қримни қонуний эгаларига қайтаришни сўраганмиз. Афсуски, ўшандан буён бу борада бирор амалий қадам ташланмади», – деган Эрдўғон.
Сиёсатчи суҳбат давомида ҳар қандай етакчи каби Путин ўз хатосини тан олиши амримаҳол экани, аммо бирор бир омил босқинни оқлай олмаслигини таъкидлаган.
Ctrl
Enter
Хато топдИнгизми
Иборани ажратиб Ctrl+Enter тугмасини босингМавзуга оид янгиликлар
